Read kumam Agole 10 Bible Online

Agole 10 - kumam bible

Agole 10

¹Magi en agole ka Sulumani. Atin ariek mio papa mere bedo kede yomcuny; aming mere mio toto mere bedo kede wangcuny.

²Abar kame dano udo i yore arac likame tie kede bero moro, do bedo kede ekite kuo kopoore laki ki to.

³Rwot likame weko kec neko dano kopoore, do en egengo dano arac likame udo gikame cunye mito.

⁴Nyapo kelo can, do tic atek kelo abar.

⁵Atin ariek coko cam ki poto i kare me kac, do atin kame buto abuta i kare me kac kelo lewic.

⁶Ngat atie kede ekite kopoore udo winyo, do dog dano arac yamo kope kame umo tim mege me gero.

⁷Ngat aber kobino yutuno en nakanaka, manono obedo winyo; do wi jo bino wil kede nying ngat arac.

⁸Ngat kame wie tio yei lubo tam kame komie, do ngat kame yamo mingomingo bino riamo kede peko.

⁹Dano ali kede raco moro i kuo mere bedo mulem, do dano kame li kede ateni bino ngere.

¹⁰Ngat kame maro umo kop kelo peko, do ngat kame yamo ne dano kop obe kelo mulem.

¹¹Kope kame dano kopoore waco obedo atan amio kuo, do kope me dano arac kano tim me gero.

¹²Adagadaga twaruno lok, do amara umo raco dedede.

¹³Kop me rieko wok ki dog dano atie kede niang, do ngamingo komie alola.

¹⁴Dano ariek coko ngec apapat, do kope kame ngamingo yamo wao peko doko iyapiyapi kede en.

¹⁵Lonyo me ngabar tie bala apama atek kame gwoke; can kelo peko i kom ngacan.

¹⁶Cul kame dano kopoore udo en kuo, do ud me dano arac tere i dub.

¹⁷Ngat kame winyo kop kame kopwonye kede udo etie lubo yongayo me kuo, do ngat kame dagi tam kame komie me riene, udo etieko parao eko rwenyo.

¹⁸Ngat kame ngaabe umo adaga kame etie kede i cunye, doko da dano kame dubo nying jo udo en ngamingo.

¹⁹Kope kame dano duro adura likame dub bwot kiye, do dano ariek likame duro yamo.

²⁰Kope kame leb dano kopoore yamo cal bala siliba kame kojililo kiber; tam me dano arac kony mere li.

²¹Kope kawok ki dog dano kopoore pito jo atot, do jomingo to pi mingo gi.

²²Winyo ka Rwot en amio dano baro; tic atek likame sobolo mini iudo abar akalamo.[3]

²³Kibut ngamingo, timo gikarac cal acala bala tuko, do tim me rieko kelo ne ngat kame niang yomcuny.

²⁴Gikame ngat arac lworo timere ne, do dano kopoore udo gikame cunye mito.

²⁵Ka yamo ager obuko en etero dano arac, do dano me ekite kopoore dong cungo di etek nakanaka.

²⁶Kibut jo kame mio tic, jonyapo tie negi bala bwini awac acamo lak dano, amoto bala yiro kame donyo i wang dano.

²⁷Lworo Rwot medo kuo me dano, do mwakini me dano arac nonok.

²⁸Gen me dano aber kelo ne yomcuny, do dano arac geno buo ngor.

²⁹Rwot gwoko dano kame bedo i ekite kopoore, do en emuducaro jo areco.

³⁰Likame tie gimoro kame bino yangaro jo kopoore, do jo areco likame bino dong i lobo noni.

³¹Dog dano kopoore yamo kope me rieko, do kobino ngongolo leb jo kame yamo kope me abe.

³²Dog dano me ekite kopoore yamo kope kame kopwoyo, do me dano arac yamo kope kogomugomun.