Read kumam Agole 15 Bible Online

Agole 15 - kumam bible

Agole 15

¹Kop kame kodwoko kede mwolo kweo gero, do kop kame kodwoko kede dwan agwai twaruno gero.

²Kame jo ariek oyamo, leb gi woto kope me ngec awinyo mit, do jomingo bwoto kop me mingo kenekene.

³Wang Rwot neno kabedo dedede; en eneno gikaber amoto gikarac kame jo timo.

⁴Kope me mwolo mio kuo, do kope areco cobo cuny dano.

⁵Ngamingo cao pwony kame nganywal mere mie, do dano kame yei winyo cor udo eriek.

⁶Abar bedo tie i ot me dano kopoore, do jo areco kei mergi kame peko opoto.

⁷Jo ariek dog gi waco kope amedo ne jo bedo kede ngec, do likame etie kamanono kede jo aming.

⁸Rwot cunye dagi giayala me jo areco, do ilega me dano kame ekite mege cil yomo cunye.

⁹Rwot cunye dagi ekite kuo me jo areco, do en emaro jo kame timo gi kopoore.

¹⁰Ngat kame dagi lubo yongayo aber udo alola agwai; ngat kame dagi be kocore en ebino to.

¹¹Rwot ngeo kiton kabedo me jo oto, do kalamo mano tien adi en kame engeo kede gikame tie i cuny dano!

¹²Joacae likame mito be riei gi; likame kimito ot udo tam kibut jo ariek.

¹³Yomcuny mio nyim dano bedo muremure, do cwercuny dwono cuny dano.

¹⁴Dano ariek cunye opong kede mit me pwonyere, do jomingo tie kede mit me timo tim me mingo.

¹⁵Jocan beo i kuo atek ceng dedede, do ka dano likame tie kede par moro i cunye, ceng acelacel me kuo mere cal bala ceng me ebaga.

¹⁶Ngat kame tie kede lim atitidi di elworo Rwot ber kalamo dano atie kede lim atot di eko bedo kede peko atot da.

¹⁷Eber ne in camo dek apura kede jo kame tie kede amara, akaka camo ringo amio kede jo kame tie kede adagadaga.

¹⁸Jo kame cuny gi rerep kelo atwomutwomun, do jo kame dio gero kelo anapakin.

¹⁹Jo anyap riamo kede peko atot i kuo gi, do jo kame ekite gi cil kuo gi yot ayota.

²⁰Idwe ariek yomo cuny papi gi, do idwe aming cao toti gi.

²¹Mingo yomo cuny dano kalikame wie tio, do dano atie kede niang timo gikame opoore.

²²Iik moroni poto ka likame jo omio tam gi iye, do ka jo amio tam iye tot, iik nono cobere.

²³Cuny dano bedo yom ka edwoko kop kakare, doko da kop kame dano yamo i kare kopoore me yamo kop nono ber adikinicel.

²⁴Jo ariek lubo yongayo kame tero gi i kuo, do weko kame tero gi i to.

²⁵Rwot dudubo paco me ngaewaka, do egwoko jame me apuserut.

²⁶Rwot dagi tam areco, do kope me kisa beco i bute.

²⁷Jo kame tie kede eranga me udo jamini i yore arac kelo peko ne jo me ude gi, do jo kame dagi kop me cemusana bino kuo.

²⁸Dano atie kede ekite kopoore tamo kop kame epoore dwoko, do dano arac doge bwoto kope areco abongo en tamo.

²⁹Rwot bor kibut jo areco, do en egamo kwac me jo kopoore.

³⁰Dano amuremure kelo kilel i cuny jo, doko da rwonge aber mio jo winyo kiber i kuo gi.

³¹Dano kame winyo kope dedede kame kowaco ne pi riene bedo dano ariek.

³²Dano adagi pwony kame komie udo ecao kuo mere kene, do ngat awinyo kop kame kocore kede en eudo niang.

³³Dano kame lworo Rubanga udo etie pwonyere bedo kede rieko, doko da mwolere en akelo ne dano wor.