Read kumam Agole 16 Bible Online

Agole 16 - kumam bible

Agole 16

¹Dano bedo kede iik mege i cunye, do Rubanga en kame mio gi kicobere.[5]

²Dano twero neno be tice mege dedede beco i wange, do Rwot ngingico gikame tie i cuny dano.

³Ket tice ni dedede i cing Rwot, en ebino mino iik ni cobere kakare.

⁴Rubanga tie kede iik i kom gi dedede kame en ecweo, iik kame en etie kede i kom jo areco en alola.

⁵Rwot cunye dagi jo dedede kame wakere; ngei kiber be akodi jo nogo likame bino bwot udo alola.

⁶Rwot sasiro dub me jo awor di kigenere, doko da lworo Rwot mio dano gwokere likame edonyo i tim areco.

⁷Kame epone me kuo ka dano moroni yomo cuny Rwot, Rwot mio jokwor me dano nono bedo kede i mulem.

⁸Eber bedo kede gi atitidi kame iudo i yore kopoore, akaka bedo kede ud adwong kame iudo i yore arac.

⁹Dano bedo kede iik mege, do Rwot en atele cobo gi.

¹⁰Kope kame abaka yamo, en eyamo gi kede twer ka Rubanga; en engolo kop kakare.

¹¹Rwot mito misani kede latiri kame pimo jame kakare; kide me pimo jame obedo tic mere.

¹²Tim areco obedo gikarac kibut abakai, pien tim kopoore en kame mio apugan cungo.

¹³Abaka cunye yom winyo kope me ateni, doko da en emaro jo kame yamo kope me ateni.

¹⁴Kame abaka odoko ger, manono twero kelo to; ngatamoro ariek tamo kweno gero me abaka nono.

¹⁵Kame nyim abaka ler, manono mio jo kuo, doko tim mere anyuto amara but dano cal bala idoun me kot adwogo i kare me agege me iporo.

¹⁶Udo rieko ber kalamo udo saabu; doko da yero bedo kede niang ber kalamo yero siliba.

¹⁷Jo abeco lubo gudo kame dapo gikarac; dano agwoko ekite me kuo mere daro kuo mere.

¹⁸Ewaka kelo ne dano peko, doko da tingere mio dano poto.

¹⁹Eber ne dano mwolere di eko bedo ngacan, ekalamo popoko jame kame koyako kede jo awakere.

²⁰Jo kame winyo kope kame kopwonyo gi iye, gi dedede bedo negi kiber; ket gen ni i kom Rwot di iko bino bedo kede yomcuny.

²¹Dano atie kede tam kocato me rieko en dano atie kede niang, doko da kop awinyo mit di epwot wao tam me jo.

²²Rieko obedo atan me kuo but dano ariek, do mingo obedo alola but ngamingo.

²³Dano ariek ber tamo kop kame emito yamo, manono mio kop kame eyamo wao tam me jo.

²⁴Kope awinyo mit cal bala mokic, ebilere mit i kuo me dano, doko emio kom dano bedo yot.

²⁵Tie ekite kuo moro kame dano twero neno be ber, do i ajikini mere en ebedo yongayo atero dano i to.

²⁶Mit me cam mio dano timo tic kitek, kec rurupo en meede tic.

²⁷Jo areco tic gi timo iik areco, doko da kope awok ki dog gi cal bala mac awango dano.

²⁸Dano atie kede ikiteso areco kelo ne jo atwomutwomun, doko da ngakwot turo awotin me jo.

²⁹Ngatim tim me gero ngalao jowote, di eko mino gi kidonyo i tim kalikame ber.

³⁰Dano amimio wange amoto aumo doge udo tie kede iik moro me timo gikarac.

³¹Lwar obedo ocoro me dwongo, dano atie kede ekite me kuo kopoore en kame bedo paka ude.

³²Dano kalikame susunyo ngoi ber kalamo dano atek, doko dano atwero dino gero mere ber kalamo dano atwero mano bomba.

³³Dano uco alulu, do adwokini mere tie i cing Rwot kene.