Read kumam Agole 17 Bible Online

Agole 17 - kumam bible

Agole 17

¹Eber bango kwon obuto kalamo ot camo ebaga i ot kame lok tie iye.

²Epasoit kame timo gi dedede kede rieko bino bedo kede akarunikin i kom wot ka ngadwong mere, doko eda ebino nywako sikao jame me paco nono.

³Kotamo saabu kede siliba kede mac pi ngeno ka kibeco, do cuny dano Rwot en kame tamo.

⁴Dano atimo tim areco ciko yite winyo kope me jo areco; won angalo da ciko yite winyo kope me abe.

⁵Ngat kame nyero ngacan udo eyeto Rubanga ngat kocwee; ngat kame cunye yom ka dano opoto i peko likame bino bwot udo alola.

⁶Jo oti tie kede ewaka pi ikwae gi, doko da idwe tie kede ewaka pi jonywal gi.

⁷Dano me awora likame yamo kope me abe, doko da ngamingo likame twero yamo kope atie kede kony.

⁸Jo kame mio cemusana tere bala yat me apipan; kitero be etwero kelo bero moro.

⁹Dano asasiro ngat otimo ne raco mio awotin meede, do ngat amoko amoka i kop moro arac kotieko kato, turo awotin.

¹⁰Kame kocoro dano atie kede niang tien acel, en epwonyere kalamo ngamingo kame kobungo tien tol acel.

¹¹Jotim tim areco tic gi en jemo, do kobino sweikino i kom gi aor ager.

¹²Eber ne in riamo kede edubu kame koneko atin mere kalamo riamo kede ngamingo kocato i tim me mingo.

¹³Peko likame weko ot me dano aculo bero kede raco.

¹⁴Acakini me lok cal bala pii apwodi cako acaka mol momot, pi manono miero ijike di pwodi likame etany.

¹⁵Rwot dagi ngat kame mio dano arac loo pido, amoto ngat kame ngolo kop i wi dano ali kede raco moro.

¹⁶Pinyo mio ngamingo dubo sente i isoma pi udo rieko, do di etie kede wic kalikame twero pwonyere?

¹⁷Ngawoti nyuto amara i kare dedede; wadu nywako kedi peko ka peko opoto ni.

¹⁸Dano awie likame tio cikere pi culo banya ka ngat apat.

¹⁹Dano acunye maro timo dub udo emaro peko da, doko da dano awakere lwongo peko i kome kene.

²⁰Dano atie kede tam areco likame udo bero moro, doko da dano alebe yamo kope me abe poto i peko.

²¹Ngat kame nywalo ngamingo ebeo i peko; nganywal me ngamingo likame tie kede yomcuny.

²²Yomcuny tie bala yat aber kame cango dano, do cwercuny jonyo dano ajonya.

²³Jo areco gamo cemusana i mung di do likame kiko ngolo ne jo kop kede ateni.

²⁴Dano atie kede niang keto tam mere i kom gikame medo ne rieko, do dano aming tam mere bedo kakabor.

²⁵Atin aming mio papa mere bedo kede par, doko da emio toto mere bedo kede wangcuny.

²⁶Likame eber tango dano ali kede raco moro, doko da likame eber bungo dano me awora pi ekite kuo mere aber.

²⁷Dano kalikame duro yamo udo etie kede ngec; ngat kame kweo cunye tie kede niang.

²⁸Pien kotwero tero jomingo da bala jo ariek ka kiling alinga di kiumo dog gi.