Read kumam Agole 19 Bible Online

Agole 19 - kumam bible

Agole 19

¹Eber bedo ngacan di itie kede ateni, elo bedo dano me angalo kame ngamingo.

²Bedo kede mit atek me timo gimoro di likame itie kede ngec iye likame ber; doko ngat kame onyaro timo gimoro donyo i peko.

³Mingo me dano mio edudubo kuo mere di eko lokere lilo kede Rwot.

⁴Abar kelo awotino atot, do ngacan jowote yai weke.

⁵Mujura me angalo likame bino bwot kede udo alola, doko ngat angalo da likame bino bwot.

⁶Jo atot mo amara kibut jo kame konyo jo, doko jo dedede mito bedo adiereson kede dano kame mio giamia.

⁷Ka do ber joawade me ngacan da dage, kara jowote do bino dage tien adi! En etamo mito yamo kede gi, do gin kidagi.

⁸Dano kame cane udo rieko udo emaro kuo mere; ngat kame pwonyere di eko keto kop kame en epwonyere iye i tic udo kuo aber.

⁹Mujura me angalo likame bwot kede udo alola, doko ngat angalo udo peko.

¹⁰Ngamingo likame poore bedo i kuo ajabajaba, doko erac kalamo ka epasoit en kame pugo jo me awora.

¹¹Dano kame wie tio likame susunyo lilo, doko en ecao raco kame kotimo ne di manono ko kelo ne wor.

¹²Ka abaka odoko ger, edorano bala engu, do ka cunye yom, eber bala toyo kame bido lum.

¹³Atin amiming kelo ne papa mere peko, doko dako kame ngalok cal bala ot kame bedo cwer nakanaka kame kot ocwei.

¹⁴Dano karuno sikao ot kede abar kibut jonywal mege, do dako ariek Rwot en kame mio dano.

¹⁵Nyapo kelo nino atek; dano ajajalun bedo kede kec.

¹⁶Gwok cik ka Rwot di iko bino bedo kuo; ka icao gi, ibino to.

¹⁷Ngat kame timo mwolo ne ngacan udo emio banya but Rwot, doko Rwot bino cule iye dedede.

¹⁸Bitaro idwe ni pi rieno gi di pwodi itie kede gen i kom gi. Ka likame ibitaro gi udo itie dubo gi.

¹⁹Ngat ager kitek gero mere nono bino kelo can i kome. Ka in ilake tien acel, ebino bobo mito be imed lake.

²⁰Winy tam kame jo mii, doko gam kop kame kopwonyi kede, tetekeny iud rieko pi kare me anyim.

²¹Dano karuno timo iik atot, do iik ka Rwot en kame bino cobere.

²²Gikame mitere i kuo me dano en cuny me wor, doko eber bedo ngacan kalamo bedo nyangalo.

²³Bedo kede lworo i kom Rwot ateteni mio dano kuo; ngat kame lworo Rwot bedo abongo gimoro kame lole, likame peko moro poto ne.

²⁴Nganyapo rwako cinge i bakuli me cam di likame eko karuno kwanye tere i doge.

²⁵Mi ngaacae alola, di jo akwia piny ko bino pwonyere ngeno gikame poore atima; riei dano ariek di en eko bino bedo kede ngec.

²⁶Atin kame timo ne papa mere tim me gero di eko riamo toto mere tenge, obedo atin kame kelo lewic kede acae but jonywal mege.

²⁷Atin na, ka iweko pwonyere, wi bino wil kede gikame ingeo.

²⁸Mujura akony mere li nywaro anywara kop kame kongolo i ateni, doko kibut jo areco, gikarac mit negi bala cam.

²⁹Kotieko ngolo kop ne jo kame joacae, doko da kobino dano dier ngei jomingo.