Read kumam Agole 22 Bible Online

Agole 22 - kumam bible

Agole 22

¹Bedo kede nying aber ber, elo bedo kede abar adwong, doko pwoc kame jo mii ber, ekalamo siliba arabo saabu.

²Gikame ribo jocan kede joabar en ine be: Rwot en kocweo gin dedede.

³Ngat kame wie tio neno peko di tie bino en eko gaikin, do dano kalikame tamo meede kede ot anyim di eko riamo kede can.

⁴Dano kame mwolere di elworo Rwot, bino udo abar kede wor kibut jo, doko ebino bedo kuo pi kare kalac.

⁵Okuto kede owic tie i yongayo kame ngat kame ikiteso mege reco lubo; ngat kame gwoko kome dapo gi.

⁶Pwonyunu idwe epone kaber kame miero kibed iye, di do kame gin kidongo, likame kibino parao tenge kiye.

⁷Joabar pugo jocan, doko ngat kame kopao gimoro edoko epasoit me ngat kame okope gi nono.

⁸Ngat kame tero jo kirac, manono en kodi mere kame en ecuwo, en ebino udo peko bala gikame en ekao, doko itidil kame en eketo i kom jo bino jik.

⁹Ngat kame mio jo jame di cunye ilajara tie kede winyo, piento en enywako cam mere kede jocan.

¹⁰Riamunu tenge dano kame ngaacae, di piem, lok kede ayet ko bino jik.

¹¹Ngat kame maro bedo kede cuny aber doko di eyamo kede mwolo bino bedo ngawot abaka.

¹²Rwot bedo neno be jo ogwoko ateni, do iik me jo kalikame genere en etotolo.

¹³Nganyapo bedo waco be, “Engu tie ooko kuno! Ebino neka ka ango adonyo ooko!”

¹⁴Kop kame dako acar waco cal bala bur atut; ngat kame wango cuny Rwot poto iye.

¹⁵Tim me mingo tie i cuny atin apwodi titidi, do ebela me pwony kwanye tenge.

¹⁶Ngat kame tero jocan kirac tetekeny eud abar, kede ngat kame mio giamia but jo kobaro, bino bedo kede kei.

¹⁷Cik yiti iko winyo kope kame jo ariek owaco di iko keto cunyi i kom pwony na,

¹⁸pien ibino bedo kede yomcuny ka imako gi i cunyi, kede ka ikaruno waco gin dedede kede wi.

¹⁹Ango atie mini ngeno gin tin tetekeny in iket gen ni i kom Rwot.

²⁰Ango atieko wandiko nin kope ot adek me acori kede kame mii rieko,

²¹pi mini ngeno gikame poore, kede me ateni. Manono bino mini idwoko kop kakare but jo kocwai.

²²Kur imai ngacan gire moro be piento en engacan, doko da kur idi ngacan kede tam i ekiko;

²³pien Rwot bino pido pire, di eko timo can i kuo me jo kame timo ne can.

²⁴Kur itim adiereson kede ngat kame ngalilo, doko da kur iupere kede ngat acunye rerep.

²⁵Pien ida ikaruno pwonyere i ekite gi nono di iko moko iye.

²⁶Kur icikere pi cungo ne dano apat pi banya mere.

²⁷Ka likame in iko karuno culo, kobino tero akadi kiton gibuto ni da.

²⁸Kur inyik gikame nyuto ikor kasek kame bin joakwari ni oketo.

²⁹In kong nen ngat kame ngadiru i tic mere; en ebino timo tic ne abaka do weko jopiny.