Read kumam Agole 23 Bible Online

Agole 23 - kumam bible

Agole 23

¹Kame in itie cam kede ngadwong, mito iniang be ngai inonono kame tie i nyimi,

²di iko bedo kede dire akadi di in itie kede eranga me cam.

³Kur ibed kede eranga i kom cam amit kame en etoko ni, pien cengemogo udo etie tamo cunyi.

⁴Kur itiek teko ni pi mito baro; bed dano ariek di iko weko tam nono.

⁵Pien kakame wangi giparo en kede, abar karuno yai kibuti ineno bala etie kede bwome di eko por tenge bala ekokom.

⁶Kur iyei ot camo cam me ngat kame ngaworo; kur ibed kede mit i kom cam amit kame en etoko.

⁷Pien dano kame cal kamanono waco ni be, “Cami doko mat da!” Do kop me cunye udo pat.

⁸Ibino ngoko gikame oudo icamo, di kope dedede amit kame oudo in ipwoye kede ko bino bedo me nono.

⁹Kur idub kare ni yamo kede ngamingo, piento en ebino cano kope ni me rieko nogo acaa.

¹⁰Kur inyik gikame nyuto ikor kasek arabo imai poti me idwe kic,

¹¹pien Rwot ngat kame gwoko gi tek, en ebino pido kede in pirgi.

¹²Ket cunyi mito pwonyere, di iko ciko yiti winyo kope kame kopwonyo.

¹³Kur iwek pwonyo idwe ni iponeso abeco; ka idao gi kede ebela, likame ebino neko gi.

¹⁴Ateteni ka in idao gi, ibino lako kuo gi.

¹⁵Atin na, ka in idoko riek, ango da cunya bino bedo yom.

¹⁶Ango abino bedo kede kilel adwong kame awinyo di in iyamo kope me ateni.

¹⁷Kur nyeko maki kede jodubo, do ket cunyi lworo Rwot.

¹⁸Pien ateteni kare kaber tie anyim, doko gen ni likame bino poto.

¹⁹Winyi, atin na, iko doko riek, di iko bedo kede tam i kom epone me kuo ni.

²⁰Kur ibedo kede jo kame mato kongo kitek, arabo jo kowor camo ringo;

²¹pien joamera kede jocam bino doko jocan, doko bedo me nino esawa dedede bino mino gi kingapo idukun.

²²Winy papa ni ngat konywali, doko kur icai toto ni kame etieko ti.

²³Ti kede sente pi udo ateni, rieko, pwonyere kede niang atut, di likame iko uco gi.

²⁴Papa me dano kopoore bedo kede kilel kadwong; ngat kame nywalo awobi kame riek bedo kede yomcuny.

²⁵Mi papa ni kede toto ni bed kede yomcuny; mi toto ni ngat konywali leli.

²⁶Atin na, winy kop na, di iko lubo epone me kuo na.

²⁷Pien malaya cal bala bur atut; dako kame ngadote cal bala kulo adiding kame dano moko iye.

²⁸En ebedo dari bala joyak di eko medo wel me cuo kalikame genere.

²⁹Nyut nango ngat kame mato kongo tuno i isawan kokato, ngat kame bedo mito mato kongo me epone apapat, di ango ako bino nyuto ni dano kame tie i peko, dano kame bedo tururo aturur, di emaro lok kede ingungur. En aporeso tie i kome me nono nono, doko wange obokere bubu.

³¹Kur inen kongo cil i yi ikopo di iko mine ewai tam ni, akadi di eliuliu benyo, akadi di imate eko donyo i dwani iwinye eber abera.

³²I cen mere en ebino mino iwinyo bala twol en okai; iwinyo lito bala dano kame ipom en otongo.

³³Wangi bino cako neno gimogo apapat, doko cunyi ko donyo paro kope mogo akony gi li.

³⁴Ibino neno bala itie nino i yi yee kame yamo tie puno i dier nam; ineno bala apien tie wire kedi.

³⁵In ibino waco be, “Miero di kojuta, do likame oko mina awanon; kobunga do likame ango atie winyo lito moro. Kongo bino tiek ki wia esawa adi? Ango atie mito kongo ace.”