Read kumam Agole 24 Bible Online

Agole 24 - kumam bible

Agole 24

¹Kur nyeko maki kede jo areco, doko kur itam pi mito timo awotin kede gi;

²pien cuny gin bedo paro kop me gero kenekene, doko kibedo yamo kope amako timo ne jo raco.

³Dano tio kede rieko pi gero ot, doko niang atut en kame mio ot cungo di etek.

⁴En etio kede ngec mere pi pongo agolai me ode kede jamini me wel, jamini kabeco kame yomo cunye.

⁵Rieko ber kalamo teko, doko da dano kame tie kede ngec ber kalamo dano atek;

⁶pien rieko karuno konyi i esawa me yi, doko kame itie kede jo atot kame mi tam abeco, in ilo yi.

⁷Kope me rieko kalamo niang me ngamingo. En likame engamo doge yamo akadi kop acel i kacokere ka jo tie poro kope kame pirgi tek.

⁸Ngat kame bedo kede iik me mito timo gikarac kobino lwonge be ngakel peko.

⁹Gikame ngamingo tamo kenekene en dub, doko cuny jo dedede dag dano kame ngaacae.

¹⁰Ka in itie kede goro i kare me peko, udo teko ni nonok ateteni.

¹¹Kur inen anena jo kame kotie tero i to gi; lak jo kame kotie pere kede gi tero ot neko.

¹²Cengemogo in itwero waco be, “Neningo, wan oudo likame ongeo gimoro iye”; benyo, in iparo be Rubanga ngat kame pimo cuny jo likame romo ngeno? Mam Rubanga ngat kame gwoki ngeo gikame in iparo i cunyi? Iparo be en likame ebino culo dano acelacel di lubere kede gikame en etimo?

¹³Atin na, cam mokic, pien eber. Doko bala kame mokic kame ton i apien mere winyiwinyi kede i lebi,

¹⁴mito ingei da be rieko mit kamanono ne kuo nin. Ka in iudo rieko, udo itie kede gen aber me anyim, doko gen ni likame bino poto.

¹⁵Kur ibed bala dano arac kame kio paco me dano kopoore pi mito suro; kur ibed kede tim me gero kakame dano kopoore bedo iye.

¹⁶Pien akadi dano kopoore pot tien kanyaare, en eyai bobo; do dano arac can ka opoto ne, emuducaro en.

¹⁷Kur ileli ka can opoto ne ngading ni, doko kur cunyi bed yom kame egete.

¹⁸Pien Rwot bino neno di cunye likame ko bino bedo yom, di likame eko mino ngading ni nono alola.

¹⁹Kur cunyi poti i kom jo areco, doko kur nyeko maki kede gi;

²⁰pien dano arac likame tie kede kuo aber me anyim; kuo mere me anyim cal bala etala kame koneko.

²¹Atin na, bed kede lworo but Rwot kede but abaka, kur iribere kede jo kame jemo negi;

²²pien jo kame timo kamanono kokaruno ngoole muducaro gi, doko ngai kame ngeo can kame Rubanga arabo abaka karuno timo?

²³Mage da obedo kope kame jorieko owaco: Likame poore ngangolkop bed kede apokapoka i kom jo.

²⁴Ngat kame waco ne dano arac be, “In ili kede raco moro,” jo bino lame, doko atekerin bino dage;

²⁵do jo kame ngolo kop lo jo areco bino bedo kiber, doko kibino udo winyo.

²⁶Ngat kame dwoko ni kop me ateni en ngat kame mari.

²⁷Iik kong poti ni, di iko pito kodere ni, en amio di do iko gero paco.

²⁸Kur imi ijura i kom ngatamoro abongo tien kop, doko dogi kur wac kop moro me angalo.

²⁹Kur iwac be, “Ango abino timo ne bala kame eda etimo na; ango da abino nyango pi gikame en etimo na.”

³⁰Ango ako beno i nget poto me ngat kame nyap, i nget poto olok me ngamingo;

³¹neningo, ako udo di okuto odongo oromo poto lung, doko doi da oume pukupuk. Apama me engaro kame oudo kocele kede oudo otieko poto piny.

³²Ango ako nene, ako paro kop mere i cunya di ako udo pwonyere.

³³Nini kong atitidi, nin giri ka imito, Dol cingi giri di iko wei,

³⁴di can ko bino ni bala kame ngayak bino ne kede dano, doko rem me jamini ko bino maki bala kame ngayi suro kede dano.