Read kumam Agole 26 Bible Online

Agole 26 - kumam bible

Agole 26

¹Bala kame akako likame poore bedo tie kede i kare me ooro, arabo kot i kare me kac, kamanono da wor likame poore kede ngamingo.

²Bala omobilo kame somo kokobo ki wi yat arabo acilagwec kame por wire ki malo, kamanono da ilam abongo tien kop moro likame mako dano.

³Asigira kodao kede del, punda kotweo doge, en kame mio gin kiko timo gikame komito negi, kamanono da miero kobung ngamingo.

⁴Kur idwoko kop me mingo kame ngat kame ming waco, pien manono mio ida ibedo rom aroma kede en.

⁵Dwok ne ngamingo kop mere me mingo kede kop me mingo, ka likame itimo kamano en ebino paro kene be eriek.

⁶Oro ngamingo kede kop rac; ecal bala dano kame tongo tiene tel en kene, arabo dano kame mo can ki kakame etie iye.

⁷Bala kame tien engwalas likame karuno konye kede, kamanono da agole kame ngamingo waco kony mere li.

⁸Mino wor but ngamingo kony mere li; ecal bala gweno sipandi di itweo gololo mere i kom sipandi.

⁹Agole kame ngamingo waco cal bala ajange me okuto kame ngamera mako i cinge.

¹⁰Dano kame mio ngamingo arabo ngamera kame ngole tic, cal bala ngagwei emal kame gweo dano moroni kenekene kame ngole.

¹¹Ngamingo kame medo timo gi me mingo cal bala ogwok kame dok nango ngok mere.

¹²Benyo, in itieko neno ngat kame nenere kene bala en eriek? Gen me pwonyo ngamingo tie kalamo ngat kame cal kamanono.

¹³Nganyapo waco be, “Ango alworo donyo ooko pien engu tie i yongayo! Engu gire tie i gudo!”

¹⁴Bala kame ekeko wire kede tuni kede tuca, kamanono da nganyapo lokulokun i apien.

¹⁵Nganyapo rwako cinge i bakuli me cam, di eko lolojun likame eko karuno kwanye tere i doge.

¹⁶Nganyapo paro bala en eriek ekalamo jo kanyaare kame karuno gango tam kame kitie kede.

¹⁷Dano kame donyo i piem kalikame make cal bala ngat kame kapakino yit ogwok kame beo i ngete.

¹⁸Dano kame ngalo ngatamoro di eko lokere waco be en oudo gire etie iwa, cal bala dano kopoi kame tie tuko kede emal kame neko dano.

²⁰Kame yen otiek, mac to; kamanono da, kame akwot li, lok da jik.

²¹Bala kame akuk mio kede mac dop, kede yen da mio mac liel, kamanono da ngalok twaruno lok.

²²Kope kame ngakwot waco mit bala dek amit kame dano mwonyo di ko donyo i yie kiber.

²³Ngat kame yamo me doge mit do di kop kame tie i cunye pat, cal bala agulu kame kocweo kede elupe do di opuco ooko mere kede siliba.

²⁴Ngading yamo kop me ecuke do di ekano kop arac i cunye.

²⁵Kame ngading ni yamo kede mwolo, kur iyei kop mere, piento en ekano kope atot areco i cunye.

²⁶Bed bala en eromo umo adagadaga mere kede kope me angalo, do rac mere bino nyutere i nyim jo dedede.

²⁷Ngat kame kunyo bur me ciko ngat ocelu en ebino lokere poto i bur mere nono, doko dano kame remoro kidi, kidi mere nono bino lokere poto i kome.

²⁸Ngat kame ngalo dano udo cunye dag dano nono, doko yamo amit me angalo kelo peko.