Read kumam Agole 27 Bible Online

Agole 27 - kumam bible

Agole 27

¹Kur iwakere pi gikame bino bedo diki, pien in likame ingeo gikame romo timere diki.

²Wek dano apat en kame wac bero ni; dano ace do weko in kikomi.

³Engaro pek, doko asinge da pek, do alola kame ngat aming kelo pek kalamo gin dedede.

⁴Dano kolilo ger doko etwero timo can, do nganyeko rac kalamo en.

⁵Ngat kame bunano in i wangi ber kalamo ngat kalikame nyuto ni amara mere.

⁶Adieruni paro piri akadi di emi lito, do ngakwor noto lemi tien atot atota, do miero igwoke.

⁷Dano kame oyeng dagi mokic, do ngat kame kec oneko akadi cam akec da mit ne.

⁸Dano koyai oweko paco cal bala winyo koyai oweko ode.

⁹Mo angwe kur yomo cuny dano, do peko dubo cuny dano.[6]

¹⁰Kur wi wil kede adieruni arabo adieru me jonywal ni. Ka in ipoto i peko, kur i ot but wadu; ngakio ni ngat kame tie iyapiyapi kedi karuno konyi kalamo joawade ni kame tie kakabor.

¹¹Atin na, bed dano ariek, di ango ako bino bedo kede yomcuny, tetekeny ango akaruno bedo tie kede kop kame adwoko ne jo kame caa.

¹²Dano kame wie tio neno peko di tie bino en eko gaikin, do dano amiming meede kede ot anyim di en eko riamo kede peko.

¹³Dano kame cungo ne ngakumbor i banya poore gam jame mege bala gikame esingao pi banya nono.

¹⁴Dano kame dilo yai odiko sek eko lamo ne ngawote winyo di eredo areda, kobino tero manono be udo etie lame kirac.

¹⁵Dako kame ngalok cal bala ot kame bedo cwer nakanaka kame kot ocwei;

¹⁶genge tek bala gengo yamo kame tie buko arabo gagao mo i cingi.

¹⁷Lilim kopeno kede lilim, kamanono da dano pwonyere kibut dano wad gi.

¹⁸Dano kame gwoko yat anyak bino camo anyakini mere, kamanono da dano kame gwoko ngadwong mere kobino mine wor.

¹⁹Bala kame dano neno kede cal mere i pii, kamanono tam kame dano tie kede nyuto ekite mere.

²⁰Likame jo romo kabedo me jo oto, kamanono da likame tie gikame romo wang dano.

²¹Siliba kede saabu kotamo teko gi kede mac, kamanono da kongeo ekite ka dano kede kop kame jo waco i kome.

²²Akadi in icur ngamingo kede alek bala curo iloya, do likame in ibino kwanyo mingo tenge ki wie.

²³Gwok romini kede diegi ni kiber, doko ket cunyi i kom doke ni;

²⁴pien abar likame bedo nakanaka. Akadi ajakanut da likame bedo nakanaka.

²⁵Kame kotieko nyaro lum me pito leini di amel oko lot, kede kame kotieko nyaro lum me bad mori di oko coko,

²⁶in ibino timo igoen ni kede yer me romini, doko ibino cato diegi di iko wilo poto.

²⁷Ibino bedo tie kede diegi kame bino mini cak kame romi kede jo me odi karacel kede anyira jotic ni.