Read kumam Agole 29 Bible Online

Agole 29 - kumam bible

Agole 29

¹Ka ocoki pi epali di in imeede kede nguti, cengemoro ibino udo awanon kalikame cango.

²Kame ngat kopoore tie i apugan, jo bedo kede kilel; do kame ngat karac en kame tie pug, jo bedo dinyo adinya.

³Atin kame maro rieko yomo cuny jonywal mege, do ngat kame mako awotin kede imalayan dudubo abar mere aduba.

⁴Piny bedo kiber ka abaka timo gikame opoore, do ka eketo cunye i sente kame komie i pipiny, en ebino dudubo piny mere.

⁵Dano kame cuko yamo kiber i kom ngat ocelu udo etie ciko ne bwoi me make.

⁶Jo areco moko i owic me dub gi, do jo kopoore wero girgi di kilelo.

⁷Ngat kopoore paro pi twero me jocan, do jo areco li kede niang kame cal kamano.

⁸Joacae karuno kelo arubaruba i bomba lung, do jo ariek kweo cuny jo.

⁹Ka dano ariek otero ngamingo pide i ekiko, ngamingo nyero nyero me acae di elelemo doko di eyetere abongo ling.

¹⁰Jonek cuny gi dagi jo kame li kede raco moro, doko gin kimoo kuo me ngat kame ikiteso mege beco.

¹¹Ngamingo nyuto lilo mere kakaler, do jo ariek dio cuny gi eliling.

¹²Ka ngapug gamo kop me angalo, jotic mege dedede doko jo areco.

¹³Gikame ribo jocan kede jo kame tidilo gi en ine: Rwot en kame mio gin dedede kikuo.

¹⁴Ka abaka ngolo kop ne jocan abongo apokapoka, apugan mere bino cungo pi kare alac.

¹⁵Bitaro atin kede riene kame etimo gimoro arac mie edoko riek, do atin kame kojalo ajala kelo ne toto mere lewic.

¹⁶Ka jo areco tie i apugan, turo iswil meede ameda, do jo kopoore bino neno di apugan gi poto.

¹⁷Bitaro idwe ni pi rieno gi, di likame gin kiko bino mini ibedo kede par; gin kiko bino yomo cunyi.

¹⁸Kakame tel ka Rubanga li iye, atotolun bedo iye, do jo kame gwoko iswil ka Rubanga tie kede yomcuny.

¹⁹In likame ikaruno rieno iponeso me jotic kede yamo ayama kenekene, pien akadi gin kiniangi, do likame kibino lubo.

²⁰Benyo, itieko neno dano kame susunyo yamo abongo kong tamo kop kame etie yamo? Gen me pwonyo ngamingo kalamo gen me pwonyo ngat kame cal kamanono.

²¹Ka in ibedo mino epasoit ni jamini dedede kame en emito cako di en pwodi atin, ceng moro acel en ebino mano jamini nin dedede di kiko bino doko mege.

²²Ngat kame ngalilo maro kelo lok doko ngagero maro tuturo iswilia.

²³Dano kame wakere bino udo lewic, do ngat kame mwolere bino udo wor.

²⁴Ngat kame ribere kede ngakuwo udo en edagi kuo mere kene, piento en ewinyo lamere me ngat kame kokwalo gire, do likame eyei tuco kop moro.

²⁵Bedo kede lworo tie ne dano bala owic, do ngat kame keto gen mere i kom Rwot bedo mulem.

²⁶Jo atot mito be ngapug pwoi gi, do ngolo kop i ateni wok kibut Rwot kenekene.

²⁷Jo kopoore cuny gi dagi jo areco, doko jo areco da cuny gi dagi jo kopoore.