Read kumam Agole 30 Bible Online

Agole 30 - kumam bible

Agole 30

¹Magi en kope kame Agur wot ka Jake owaco: “Ango aol, Okwe Rubanga, Ango gira aol do, Okwe Rubanga, likame atwero kanyakino.

²Ateteni ango aming doko oudo likame apoore bedo dano; ango likame atie kede niang kame jo poore bedo kede.

³Ango likame atieko doko riek, doko ali kede ngec moro i kom Rubanga.

⁴Benyo, tie dano moro kame otieko ot malo di eko dwogo i piny kan? Ngai kotieko mako yamo di eko bunono en i cinge? Benyo, tie dano moro kotieko bono pii kede egoe? Ngai en koketo ajikini me lobo? Ngai inonono? Nying atin mere ngai? Waca ka ateteni in ingeo!

⁵“Kope dedede kame Rubanga waco timere ateteni; en ecal bala ebuku but jo dedede kame ringo gwokere bute.

⁶Kur imed kop moro i kom kop mere, ka itimo, en ebino bunano in di eko nyuto be in ingalo.”

⁷Rubanga, ango akwai imia jamini are di pwodi likame ato:

⁸Kwany angalo tenge kibuta, di likame iko mina abed ngacan arabo abed kede abar akalamo; mia kenekene cam kame mitere na.

⁹Pien ka ango ako baro twatwal, cengemogo ako bino dagi, doko ka ako bedo ngacan, cengemogo ako bino timo kuwo di ako dubo nying Rubanga na.

¹⁰Kur idub nying ngatic moro but ngadwong mere, pien ka itimo, en ebino lami, di in iko bino udo peko pi manono.

¹¹Tie jo kame lamo papi gi doko da likame kipwoyo toti gi.

¹²Tie jo kame nenere ken gi be gin kili kede raco moro do di gin pwodi kipwokere kede dub.

¹³Tie jo kame paro bala gin kibeco twatwal, gin kitie kede neno me acae!

¹⁴Tie jo kame tio kede twer gi pi tero kirac jocan kede jo kame piny oloo, ineno bala kimito tieko gi pitipit ki wi lobo.

¹⁵Odike tie kede anyira are; gin kikok be, “Mia, mia ba!” Tie jamini ongwon kalikame bilo waco be, “Eromo do”:

¹⁶kabedo me jo oto, adonge, lobo kotuo kame mito pii nakanaka, kede mac kalikame waco be, “Eromo do.”

¹⁷Ngat kame nyero papa mere arabo kame cao toto mere, agak me aditot bino golo wange, arabo acut bino came.

¹⁸Tie jamini ongwon me aura kame niang iye tek nango:

¹⁹kite kame ekokom por kede i edou, kite kame twol liao kede i wi lela, kite kame emeri kwango kede i nam, kite kame dako mitere kede icuo.

²⁰Dako kame ngadote timo kaman: en etimo adote di eko lwokere, di eko waco be, “Likame tie gimoro arac kame ango atimo.”

²¹Tie jamini ongwon kame yango wi lobo, doko jo me piny kan likame karuno kanyakino gi:

²²epasoit kame lokere doko abaka, ngamingo kame tie kede cam dedede kame en emito,

²³dako kame cuny jo oudo dagi do di eko udo icuo i cen mere, kede dako apasoit kame lunyo wang dako won ot.

²⁴Tie giacwea ongwon atitino i lobo kan, do kiriek twatwal:

²⁵cukuno li kede teko moro, do gin kicoko cam gi di iko kano i kare me iporo.

²⁶Eles da li kede teko moro, do gin kitimo ude gi kakame kide tie iye.

²⁷Obonyo li kede abaka, do gin kisirito karacel.

²⁸Igwegwe tie gikame in ikaruno mako i cingi, do gida kibedo i miere me abaka.

²⁹Tie jamini ongwon aoto kede ewaka:

³⁰engu, le kame tek kikom leini dedede me obar doko likame tie le moro kame en elworo;

³¹tongweno aoto kede ewaka, ekoroi, kede abaka aoto i nyim jo mege.

³²Ka lem in imiming di ibedo wakere, arabo ka lem in ibedo paro timo gikarac, mak do asisa di iko tamo.

³³Pien bala kame kopuo kede cak di mo kowok kiye, kede ka obuo um dano remo cwer kiye, kamanono da tim me kolo kelo lok.