Read kumam Agole 31 Bible Online

Agole 31 - kumam bible

Agole 31

¹Magi en kope ka Abaka Lemuel kame toto mere opwonye kede:

²Abin awaci benyo atin na! Okwe, atin me yia! Atin kame ango akwongere pire!

³Kur itiek teko ni kede abar ni i kom mon, jo kame reto abakai.

⁴Lemuel, winyi. Abakai likame poore mato bwini arabo jopug maro mato kongo akec.

⁵Pien gin kikaruno mato kongo di wi gi ko wil kede iswil di do likame kiko paro pi twero me jocan.

⁶Kongo kede bwini poore ne jo kame do tie to arabo jo kame tie kede cwercuny atek.

⁷Wek gin kimati di wi gi ko wil kede can gi di likame kiko yutuno peko gi atwal.

⁸Bed dwan jo kame li kede dwan, yam pi twero me jo kame piny oloo.

⁹Yam pirgi doko ngol kop kame poore. Gwok twero me jocan kede jo kame piny oloo.

¹⁰Udo dako kame ber tin tek benyo! En eber ekalamo kide me wel.

¹¹Cware keto gen mere i kome kede cunye dedede, doko likame tie gimoro kame icuo nono kei.

¹²Pi kare me kuo mere lung, dako nono timo ne cware bero do weko raco.

¹³En kome mit timo igoen me yer me oromo kede igoen acil kame meny.

¹⁴En eomo cam mere ki kakabor bala kame imerin kame yeo jamini timo.

¹⁵Dako nono dilo yai odiko sek di pwodi piny col di eko iiko cam ne jo me ode, kede eko waco ne anyira jotic mege tice me atima.

¹⁶Dako nono neno lobo di eko wilo, doko en epito olok kede sente mere kame en eudo kede teko mere.

¹⁷Dako nono tek i tic, doko etio esawa dedede.

¹⁸Dako nono ngeo jamini me acata kame kelo ne ameda, doko iwor en etio paka esawa kokato di etala mere liel.

¹⁹Dako nono timo ausin mege en kikome di eko cweno igoen mege.

²⁰Dako nono konyo kede cunye lung jocan kede jo kame piny oloo.

²¹I kare me ngico me piny en cunye likame poto, pien jo me ode dedede tie kede igoen kame mio kom gi lieto.

²²Dako nono timo isukan mege me um, doko engapo igoen akwakwar kame meny.

²³Jo mio cware wor i kacokere i erute me bomba, kakame en ebedo iye i diere me joadongo me piny.

²⁴Dako nono timo igoen ameny, kede ausin me tweno pier, di eko cato gi but jocat.

²⁵Dako nono tek doko jo mie wor, doko eli kede lworo moro pi kare me anyim.

²⁶Dako nono yamo kede rieko, doko epwonyo kede mwolo.

²⁷Dako nono gwoko jo me ode kiber, doko likame ebedo abeda dubo kare.

²⁸Idwe mege pwoye, doko cware da pwoye di epake.

²⁹Cware waco ne be, “Mon atot otieko timo jamini abeco twatwal, do in ilo gin dedede.”

³⁰Tim me esupe ngalo dano, doko cilo da kony mere li, do dako kame lworo Rwot miero jo pwoi.

³¹Miero kopwoye pi gi dedede kame en etimo, doko miero kopwoye i kacokere i erute me bomba pi tice mege.