Read kumam Agole 4 Bible Online

Agole 4 - kumam bible

Agole 4

¹Idwe na, winyunu pwony kame papa wu tie mino wu. Cikunu yitu tetekeny iudunu niang;

²pien kope kame ango atie pwonyo wu beco, kur idagunu pwony na.

³I kare kame oudo ango pwodi atitidi kede, di atie kede jonywal na, di oudo toto na mara,

⁴papa na oudo pwonya di ewaco na be, “Kan kope na i cunyi; lub gikame aciki timo, di iko bino kuo.”

⁵Ud rieko kede niang! Kur imi wi wil kede kope kame awaco ni amoto dagi gi.

⁶Kur iwek rieko, en eko bino gwoki; kom mare, di en eko bino dari likame gimoro timi.

⁷Gikame pire tek kame ipoore cako udo me agege en rieko; doko da udo niang atut miero tel ne jame dedede kame in iudo yongayo.

⁸Mie ebed gikame pire tek twatwal, di en eko bino mini dwongo. Lide kitek, di en eko bino kelo ni wor.

⁹Rieko bino bedo ni bala egoe acil me umo wic; en ebino bedo ni bala ocoro acil me angosibib.

¹⁰Atin na, cik yiti iwiny kope kame awaco ni di iko yei gi, tetekeny ibed kuo pi mwakini atot.

¹¹Ango atieko pwonyi epone me bedo ngat ariek; atieko nyuto ni epone me kuo kopoore.

¹²Kame itie ot likame gimoro bino rire i nyimi, doko da ka iringo likame ibino getar.

¹³Lide alida baba i kom pwony kame iudo; kur iweke ebwoti; gwoke kiber, piento en ebedo kuo ni.

¹⁴Kur idonyi i tim me jo areco; kur ilub ikiteso me jo kame timo gikarac.

¹⁵Kom weke; kur idonyi iye; pange di iko giri kato akata.

¹⁶Pien jo areco likame nino tuno di kitieko timo gimoro arac; wang gi bedo twolo tuno di kitieko mino ngatamoro ogetar.

¹⁷Tim areco tie bala mugati kame gin kicamo, doko da tim me gero tie bala bwini kame gin kimato.

¹⁸Do yongayo kame jo kopoore lubo cal bala lero kame bino owal owal, kame meede ameda tuno ceng wok.

¹⁹Yongayo kame jo areco lubo cal bala piny acol cucucuc; likame gin kitwero ngeno gikame getaro gi.

²⁰Atin na, ket tam ni winyo kope na; cik yiti winyo gikame atie yamo.

²¹Kur imi gi kiyai tenge kibuti; kan gi i cunyi.

²²Gin kimio kuo but jo kame cane paka udo gi, doko da kikelo cango i kom jo nogo.

²³Gwokere i yore dedede i kom gikame cunyi paro, pien cuny dano en atan me kuo.

²⁴Wek waco kope me abe; mi kope kalikame obedo me ateni bed bor ki dogi.

²⁵Cik wangi neno anyim, kur ilok wangi karamoro ace.

²⁶Ket tam ni ngingico yongayo kame itie lubo, di gi dedede kame itimo ko bino cobere kakare.

²⁷Kur itagere tuni kede tuca; mi tieni riei ariea yongayo kur iparao timo gimoro arac.