Read kumam Agole 5 Bible Online

Agole 5 - kumam bible

Agole 5

¹Atin na, ket tam ni winyo kope na me rieko; cik yiti i kom kope na me niang,

²me wek ibed kede tam kopoore, di dogi ko donyo yamo kope me rieko.

³Pien kop kame wok ki dog dako acar winyiwinyi bala mokic; yamo mere ber kalamo mo me olibeti;

⁴do i ajikini dako nono doko kec bala eusuk, en edoko bit bala epima atie kede lebe tuni tuni.

⁵En eteri i to; yongayo me kuo mere teri i kabedo me jo oto.

⁶En likame etiro lubo yongayo me kuo; do en enare parao, di likame eko ngeno gikame tie timere da.

⁷Nan do, atin na, winy gikame atie waco ni; kur idagi winyo kope me doga.

⁸Mi kuo ni bed bor kede dako nono, kom kur inok ekeko me ode da;

⁹aso ka li, in ibino mino jo apat lunyo udo wor kame in itie kede, di jo kame li kede kisa ko bino neki di kare kame oudo pwodi ipoore kuo kede lac,

¹⁰di do jo atatai ko bino lak kede abar ni, di gikame icane iye ko ot i ot ka ngatamoro.

¹¹I kare me ajikini me kuo ni, ibino cur i kabuto, di komi oroi roc,

¹²di iwaco be, “Okwe, bin ango adagi winyo pwony, cunya oudo dagi kop kame riea!

¹³Likame ayei winyo kop me jo koudo pwonya, likame aciko yita but gi.

¹⁴Nan do atieko tuno kakame lewic bino maka kede i nyim jo kocokere.”

¹⁵Mat pii me atan nin kenekene, manono en dako ni; pii kame mol wok ki kulo nin kikomi.

¹⁶Benyo, miero pii me atan nin mol atatai, ebed parapara i yote kago?

¹⁷Gwoke ebed merin keni, do weko me nywako kede jo atatai.

¹⁸Atan nin, manono en dako ni, poore ebed tie kede winyo; doko da ipoore bedo kede kilel pi dako ni kame inyomo di pwodi in eponga,

¹⁹en ebedo dako acil di ibus bala amiem. Miero kome yom cunyi i kare dedede; miero amara kame etie kede buti pong kuo ni odocon.

²⁰Woda, pinyo kamio ibedo kede amara but dako apat, di iko gwako kor dako angadote?

²¹Pien Rwot neno gi dedede kame jo timo, doko en engico kabedo dedede kame jo oto iye.

²²Dub me jo areco obedo gikame ciko gi; gin kimoko i bwoi me dub gi.

²³Gin kirwenyo di kiko atotoun pi mingo gi, kede pi kite kalikame kitwero didio kede mit gi.