Read kumam Agole 8 Bible Online

Agole 8 - kumam bible

Agole 8

¹Rieko tie lwongere; niang atut okiarao dwane tetekeny jo winyi.

²En ecungo kakimukurur me nget gudo, kede i akarakara me yote.

³I kakame jo donyo i bomba kiye, i erute me bomba en etie lwongere be,

⁴“Okweunu, ango atie lwongo wu; ango atie lwongo jo dedede akuo i wi lobo.

⁵Wun jo kame pwodi ikwianu piny, pwonyerenu bedo kede tam kocato; wun jo aming, pwonyerenu bedo jo ariek.

⁶Winyunu, pien ango abino waco kope abeco twatwal, doga bino waco gikame tie kakare.

⁷Doga bino waco gi me ateni; kope me abe tie bala gi me kwer buta.

⁸Kope dedede kame doga waco obedo kope me ateni; likame tie moro iye kodwanyere amoto kobedo me abe.

⁹Kibut ngat atie kede niang gin kibedo kope koriere, kibut ngat atie kede ngec gin kibedo kope me ateni.

¹⁰Yerunu pwony na akaka siliba; yerunu ngec akaka saabu kame kojililo.

¹¹“Pien rieko ber kalamo kide me wel amalo; likame tie gimoro kame wun imitunu kame kosobolo poro kede.

¹²Ango rieko, atie kede niang atut; atie kede ngec kede tam kopoore.

¹³Bedo kede wor but Rwot en dagi gikarac; ango cunya dagi ewaka, kede tingere, kede tim areco, kede yamo kope me abe.

¹⁴Ango amio tam aber doko atimo gi dedede kede rieko; atie kede niang kede teko.

¹⁵Ango en kame akonyo abakai i tic gi me pug, ango en kame akonyo gi keto iswilia kopoore.

¹⁶Jopug dedede pugo kede kony kame ango amio gi, karacel kede jotice adongo, jo dedede kame pugo i yore kopoore.

¹⁷Ango amaro jo kame mara, doko jo kame cane mona wuda.

¹⁸Ango atwero mino wu iudunu abar kede wor, atwero mino wu lonyo abedo nakanaka kede mulem i yote dedede.

¹⁹Gikame ango amio ber kalamo saabu, ekalamo kiton saabu kame kojililo, doko da gikame udere kibuta ber kalamo siliba kame kotwako kiber.

²⁰Ango alubo yongayo me kuo kopoore, ekite kuo kame ango alubo en me timo gi dedede i yore me ateni;

²¹amio jo kame mara abar, apongo ude gi kede jame abeco.

²²“Rwot omiango abedo tie me agege i acakini me tic mere, ango rieko abedo tic mere me agege me kare kasek.

²³Sek kede sek ango oudo koketa, koketango me agege di pwodi likame lobo ocakere.

²⁴Konywalango di pwodi name adongo li, di ataneko kopong kede pii pwodi li.

²⁵Ango aneeno i lobo ni di pwodi likame kotimo mori, di pwodi likame kotimo imukuran da,

²⁶di pwodi likame Rubanga ocweo wi lobo kede ebar kame tie iye, akadi dul moro atitidi me lobo kame tie i piny.

²⁷Oudo ango atie i kare kame en ecibo kede malo, i kare kame en egiro kede wi nam adwong lukaro, kariamo me edou kede wi lobo,

²⁸kakame en eketo kede idoun malo, kakame en ecibo kede wen pie me name adongo,

²⁹di eko cibo ne pie me name adongo ikor kame kijik iye, tetekeny pie kur tur cik mere. Oudo ango atie kakame en ecibo kede acakini me lobo.

³⁰Oudo ango atie i ngete bala ngatic atie kede diru,[2] ango oudo amie yomcuny ceng dedede, di alelo i nyime nakanaka,

³¹oudo alelo pi piny mere, doko di cunya yom pi jo.

³²“Idwe na, nan winyunu gikame ango atie waco ne wu. Kitie kede yomcuny jo kame lubo gikame ango awaco.

³³Winyunu gikame kopwonyo wu iye ikounu bino doko jo ariek, kur idagunu gi.

³⁴Kitie kede yomcuny jo kame winyo kop na, jo kame bedo ciko wang gi i erute na ceng dedede, jo kame kura i dog ekeko.

³⁵Pien ngat kame wuda, udo eudo kuo, doko cuny Rwot bino bedo yom kede;

³⁶do jo kalikame wuda, udo kiwanere ken gi; jo dedede kame daga udo kimaro to.”