Read kumam Ngarab kop 1 Bible Online

Ngarab kop 1 - kumam bible

Ngarab kop 1

¹Magonogi en kope me Ngarab kop, wot Daudi abaka me Yerusalem.

²Jamini dedede cal bala buongor, kony gi li atwal atwala! Manoni ngarab kop en owaco. Likame tie gimoro kame kony mere tie.

³Nyo kara kame dano udo i cane mege me timo tic kede teko i piny kan?

⁴Lwak me jo bino di kiko kato, lwak ace di bino lunyo wang gi, do lobo dong kamanono nakanaka.

⁵Ceng wok, di eko donyo, di eko susunyo dok kakame ewok kiye.

⁶Yamo buko eoto i bad tetu piny, di eko lokere buko eoto i bad tetu malo; en ebuko ewiwirun kamanono, tuno en dok kakame oudo ecakere kiye.

⁷Icileta dedede mol kioto i nam adwong, do nam adwong pwodi likame opong. Pii dok i icileta bobo, di kiko cako bobo mol ot i nam adwong.

⁸Gi dedede olo dano, kikelo olo kalikame wacere. Wang dano likame yeng kede nen; yit da winyo kope likame rome.

⁹Gikame lem tie, en kame bino bedo tie. Doko gikame lem kotimo, en kame bobo kobino timo; likame tie gimoro anyen i piny kan.

¹⁰Benyo, tie gimoro anyen kame kokaruno waco be, “Neningo, gini nyen”? Li kom, pien udo etieko timere sek di pwodi likame konywalo wan.

¹¹Likame tie dano moro me kare kasek kame bobo koyutuno, akadi jo kame kobino nywalo da, jo kame bino lunyo cen ngei gi likame bino yutuno gi.

¹²Ango Ngarab kop, i kare kame bin ango apugo kede bala abaka me Isirael i Yerusalem,

¹³ako tamo kede rieko na dedede pi mito niang gi dedede kame kotimo i piny kan. Rubanga otieko mino jo tic atek me lole, kalikame kelo negi yomcuny.

¹⁴Ango atieko neno gi dedede kame jo timo i piny kan, neningo, gin dedede kical bala buongor, arabo riamo yamo.

¹⁵Gi kotieko gom, likame kokaruno rieno; gikame li, likame kokaruno maro wel mere.

¹⁶Ango ako waco i cunya kena be, “Ango atieko udo twon rieko, kame kalamo me jo dedede kogeo pugo Yerusalem di pwodi ango. Rieko kede ngec likame nyen kibuta.”

¹⁷Ango ako keto tam na mito ngeno rieko, poi, kede mingo. Ango ako udo be manoni da cal bala riamo yamo.

¹⁸Pien ka in iriek twatwal, ibedo da kede par atot; ka ngec nin meede, cwercuny ni da meede.