Read kumam Ngarab kop 2 Bible Online

Ngarab kop 2 - kumam bible

Ngarab kop 2

¹Ango ako waco ne koma kena be, “Bia kong, ango amito bilo gikame kolwongo be yomcuny; bed i kuo aber di iko ilel.” Do ako udo be manoni da kony mere li.

²Ango ako waco be, “Nyero kom obedo tim me mingo, doko bero moro li i yomcuny.”

³Aso, ango ako tamo mino koma udo alakanar kede mato bwini, pi mito ngeno dwong me mingo. Ango oudo amito udo gimoro aber kame dano poore timo i kare me kuo mere acecek i piny kan.

⁴Ango ako timo jamini adongodongo. Agero ude, kede ako puro poti me olok pira.

⁵Apuro poti na, di ako pito yen me anyakini apapat i yi gi.

⁶Akunyo ataparin na me pii kame kobwobwongo kede yen na koudo tie dongo.

⁷Ango ako wilo ipasoi acuo kede amon, doko oudo atie kede ipasoi kame konywalo anywala i oda; oudo atie kede twon abar me doke, diegi kede romini, kame kato me jo dedede kotieko bedo Yerusalem.

⁸Ango ako coko da siliba kede saabu kame yai kibut abakai me pinye kame ango oudo apugo. Ango oudo atie da kede cuo kede mon koudo wero nango were me galo wang, kede gi dedede keme yomo cunya.

⁹Aso, ango ako doko twon dano kame nyinge iruo kalamo me jo dedede kogeo bedo Yerusalem di pwodi ango. Ako dong da di atie kede rieko adwong.

¹⁰Gimoroni kenekene kame oudo wanga okao, ango likame aweko. Gimoroni me yomcuny kame oudo cunya mito, ango atimo, pien ango oudo audo yomcuny i lole na dedede, doko manoni en oko bedo giamia nango me pwoc pi lole na dedede.

¹¹Di ango ako tamo kop i kom tice dedede kame ango oudo atieko timo, kede teko dedede kame ango aketo iye, ango ako udo be, gin dedede oudo kical bala buongor arabo riamo yamo.

¹²Aso, ango ako bedo tamo kop i kom rieko, poi, kede mingo. Pien nyo kame ngat alunyo wang abaka karuno timo apat kede gikame abakai kogeo pug nen obedo timo?

¹³Di do ango ako neno be, “Rieko ber lo mingo bala kame lero lo kede colpiny.

¹⁴Jo ariek neno kakame kitie ot iye, do jomingo kioto i colo.” Aso di ango ako neno be jo ariek kede jo aming, ajikini gi obedo acel.

¹⁵Ango ako waco i cunya be, “Gikame bino timere ne ngamingo bino timere ne ada; nyo do kame ango ako bino udo pi bedo riek?” Ango ako waco i cunya be manoni da kony mere li.

¹⁶Pien ngat ariek arabo ngamingo likame kobino bedo yutuno nakanaka. I kare me anyim gin dedede wi jo bino wil kede gi. Benyo benyo kame jo ariek to kede bala jomingo?

¹⁷Manono oko mino cunya odagi kuo, pien gikame kotimo i piny kan kelo nango cwercuny; gin dedede kical bala buongor arabo riamo yamo.

¹⁸Manono oko mino cunya oko bedo kec i kom lole kame oudo abedo iye i piny kan, ka aneno be gi dedede kame ango atimo miero awek ne jo kame bino lunyo cen ngea,

¹⁹do ngai nat kame ngeo ka jo nogo bino bedo jo ariek amoto jo amiming? Aso di gin en kame kibino tero jamini dedede kame ango abedo lole iye di atio kede rieko na i piny kan. Manoni da kony mere li.

²⁰Aso ango ako parere twatwal pi lole na dedede kame oudo abedo iye i piny kan.

²¹Pien cengemogo dano romo cane timo tic kede rieko, kede ngec kede diru mere, di eko weko jamini nogo dedede kame en ebedo cane pirgi nogo ne dano apat, kalikame omulo timo gimoro pi udo jamini nogo. Manoni da kony mere li, doko erac twatwal.

²²Kara nyo kame jo udo pi lole kede cane gi kame gin kitimo i piny kan?

²³Pien kare me kuo gin lung opong kede lito, doko tice kame kitimo obedo me abarawic; kiton iwor da wi gi likame wei. Manoni da kony mere li.

²⁴Likame tie gimoro kame ber kame dano poore timo, kame lo en bedo cam kede amata, di eko udo yomcuny pi tice kame en ebedo lole iye. Manoni da ango ako neno be Rubanga en kame mio.

²⁵Pien abongo en, ngai kame twero cam arabo bedo kede yomcuny?

²⁶Rubanga mio rieko kede ngec kede ilel but ngat kame yomo cunye; do ngadubo en emio timo tic me coko abar acoka, di eko mino gi but ngat kame yomo cunye. Manoni da kony mere li. Ecal bala riamo yamo.