Read kumam Ngarab kop 3 Bible Online

Ngarab kop 3 - kumam bible

Ngarab kop 3

¹Jamini dedede tie kede kare gi, gi dedede kame timere i piny kan tie kede kare mere.

²Tie kare me nywalo dano, kede kare me to mere, kare me pito kodi, kede kare me puto gikame oudo kopito,

³kare me neko, kede kare me cango, kare me reto piny, kede kare me gero.

⁴Tie kare me koko, kede kare me nyero, kare me iturur, kede kare me miel,

⁵kare me lwolwomo kide kede kare me coko kide, kare me gwakere kede kare me likame gwakere.

⁶Tie kare me udo, kede kare me rwenyo, kare me gwoko, kede kare me uco tenge,

⁷kare me nyinyilo, kede kare me kuno, kare me ling alinga, kede kare me yamo.

⁸Tie kare me amara, kede kare me dagere, kare me yi, kede kare me mulem.

⁹Nyo kame wan oudunu pi tice dedede kame ocanenu iye?

¹⁰Ango atieko neno tic kame Rubanga otieko mino jo pi gin bedo lolo kom gi kede.

¹¹En etieko timo kare kame poore pi gi dedede. Etieko keto i cuny dano imiela me mito ngeno kare kokato kede kare me anyim, akadi kamanono da, jo likame karuno ngeno gi dedede kame Rubanga timo.

¹²Ango ako niang be likame tie gimoro aber kame dano poore timo, kame kalamo en bedo kede yomcuny, di eko timo gikame en ekaruno di pwodi ekuo.

¹³Dano poore cam di eko amata di eko yomo cunye kede gikame en ebedo cane iye, pien manono obedo giamia ka Rubanga.

¹⁴Ango angeo be gi dedede kame Rubanga timo bedo nakanaka. Likame tie gimoro kame kokaruno medo iye, arabo kwanyo tenge kiye. Rubanga otimo manoni tetekeny jo bed kede lworo bute.

¹⁵Gi dedede kame timere nan, arabo kame bino timere, udo otieko timere ngoce sek. Rubanga mio gi kotimere ngoce sek timere bobo.

¹⁶Medo i wi manono, ango atieko neno be i wi lobo kan, akaka ngolo kop me ateni, tim areco en kame kolunyo timo, doko akaka tim kopoore, gikareco en kame kolunyo timo.

¹⁷Ango ako waco i cunya be, “Rubanga bino ngolo kop ne jo kopoore kede jo areco da, piento en etieko iiko kare me gi dedede.”

¹⁸I kom kop amako dano, ango ako tamo i cunya kena be Rubanga tie tamo jo pi nyuto negi be gin kirom aroma kede leini.

¹⁹Pien gikame timere ne jo, timere ne leini da; jo to, leini da to. Gin dedede kiwei, doko likame tie gimoro kame jo kato kede leini; gin dedede kony gi li.

²⁰Gin dedede kioto kabedo acel; gin dedede kiyai ki apua, doko gin dedede kidok i apua.

²¹Ngai bo angeo arabo tipo me dano oto malo do me leini oto piny i lobo?

²²Aso, ango ako niang be likame tie gimoro aber kalamo jo bedo kede yomcuny pi tic kame gin kitimo, pien manono en kame kopoko negi. Likame tie epone moro kame wan otwero ngeno kede gikame bino timere i cen me wan to.