Read kumam Ngarab kop 4 Bible Online

Ngarab kop 4 - kumam bible

Ngarab kop 4

¹Ango bobo ako neno kite kame kotero kede jo icegun kirac i piny kan. Jo kame kotero kirac oudo tie koko, do likame oudo tie ngatamoro kame kweo cuny gi. Jo koudo tero gi kirac nogo oudo tie kede twon twer, en komio oudo likame tie ngatamoro kame twero kweno cuny gi.

²Manono oko mino ango atamo be jo kotieko to tie kiber kalamo jo kame pwodi tie kuo.

³Do jo kame do tie kiber kalamo jo dedede en jo kame pwodi likame konywalo; pien gin pwodi likame kineno tim areco kame kotimo i piny kan.

⁴Ango ako neno be lole dedede kame jo bedo kede, apiranut dedede kame jo timo kede tice, gin dedede kiyai ki ingobel kame kitie kede but jo icegun. Manoni da cal bala buongor arabo riamo yamo.

⁵Ngamingo dolo cinge di eko kanyo kec paka to.

⁶Eber ne dano bedo kede jamini anonok di etie kede yomcuny, elo bedo lole pi mito jamini atot, kame da cal bala riamo yamo.

⁷Tie bobo gimoro ace kame ango aneno be kony mere li i piny kan.

⁸Manoni en dano kame tie kene, abongo atin moro arabo imiegu mege, do di ebedo lole timo tic kamanono abongo wei, doko da abar kame etie kede likame rome. En kong likame epenyere kene be, “Kara ngai do kame ango atie lole timo tic pire, kame mio ango akei bedo kede yomcuny?” Manoni da kony mere li, doko ebedo kuo kame yomcuny li iye.

⁹Jo are ber lo ngat acel, pien gin kiribo cing gi di kiko udo adwokini aber me tic kame kitimo.

¹⁰Ka ngat acel opoto piny, nget ocelu kiarao malo ngat kopoto. Do ka dano tie kene di eko poto piny, eneno can twatwal, pien likame tie dano ace kame romo konye.

¹¹Bobo da ka piny ngic, jo are ribo buto di kom gi ko bedo liet, do benyo benyo kame dano atie kene obo kede kome kene?

¹²Ngakwor twero bwono dano kame tie kene, do jo are bwone. Auno kame okedo kidek coto tek.

¹³Dano twero yai ki bedo ngacan di eko doko ngapug me piny gi, arabo etwero wok ki otkol di eko doko abaka, do ka i kare me tio mere en eko doko miming edagi winyo acora, eponga kame obedo ngacan do di eriek, ber loe.

¹⁵Ango ako neno di jo dedede me piny lubo eponga kobedo ngatel nono, kame oudo olunyo wang abaka.

¹⁶Jo koudo lube likame wel gi marere. Aso di jo kame bino bino ki cen, likame bino bedo kede pwoc bute. Ateteni manoni da cal bala buongor arabo riamo yamo.