Read kumam Ngarab kop 5 Bible Online

Ngarab kop 5 - kumam bible

Ngarab kop 5

¹Poore igwokere ka ioto i ot ka Rubanga. Ot kunono pi winyo kop ber lo mino giayala bala kame jomingo timo, pien gin likame kingeo gwokere ki dub.

²Kur iyamo atatai abongo paro kop kame iyamo, doko kur cunyi miel timo cikere but Rubanga. Rubanga tie i malo, do in itie i piny, pi mano, kur idur kop.

³Ka in ibedo paro kop i kom gimoro, ileke. Ka in iduro yamo, likame iru yamo kop me mingo.

⁴Aso, ka in itimo cikere but Rubanga, cob time awakawaka. En likame cunye yom i kom jomingo. Poore icob timo gikame ikwongere iye.

⁵Eber ka in likame itimo kwongere moro, elo in kwongere di likame iko cobo time.

⁶Kur kop me dogi mi ipoti i dub, di in iko waco ne ngaor ka Rubanga be dogi oudo obucar abucar. Pinyo kame mio in imito mino Rubanga cunye wang i komi pi kope me dogi, di eko dudubo gikame in ibedo timo.

⁷Akadi ibed kede lek atot benyo, arabo itim tice akony gi li, amoto idur kope atot, do in poore ilwor Rubanga.

⁸Kur ibed kede ur ka ineno apugan tero jocan kirac di likame kongolo negi kop kakare, doko di otuturo twero gi me dano. Ngapug acelacel tie kede ngapug kame loe, ngat kame umo tice mege areco, bobo da jopug kame lo gi nogo da tie kede jopug kame lo gin dedede.

⁹Do i gi dedede, abaka udo kony adwong i poti kame jo puro.

¹⁰Ka in cunyi maro sente, sente likame bino romi; akadi ka in cunyi maro abar, abar da likame bino romi. Manoni da kony mere li.

¹¹Ka abar ni omeede, wel me jo kame camo gi da meede. Nyo kame in do iudo i abar ni nono, kwanyo kenekene nene anena kede wangi?

¹²Epakasit, akadi bed bala cam orome amoto li, enino iwor adikinicel, do ngabar likame nino pi paro abar mere.

¹³Tie gimoro arac twatwal kame ango aneno i piny kan: jo kano abar di abar nono ko kelo negi peko.

¹⁴Kitamakino timo gimoro kede abar nono di winyo arac ko mako gi, kiko rwenye, di kiko dong abongo gimoro kame kiweko ne idwe gi.

¹⁵Wan obino i piny kan nono abongo gimoro, ka oto, obino bobo dok kamanono, nono bala kite kame oudo obino kede. Likame tie gimoro kame obedo lole pire, kame obino mako oko ot kede.

¹⁶Manoni da obedo gikarac twatwal. Wan odok bala kite kame oudo obino kede. Nyo do kame wan oudo ki lole wa riamo yamo?

¹⁷Medo i wi manono, pi kare me kuo wa lung, wan ocamo abongo yomcuny, di otie kede par, oli kede yotkom, doko cuny wa kec.

¹⁸Gikame ango atieko neno be ber kame poore atima en cam kede amata, di dano ko bedo kede yomcuny i gi dedede kame en ebedo lole timo i piny kan, pi kare acecek me kuo kame Rubanga omie; pien manono en kame kotieko poko ne wa.

¹⁹Ka Rubanga omio dano abar kede jamini, di eko mine yomcuny i kom gi nogo, poore ebed kede pwoc, di eko bedo kede yomcuny i gikame en ebedo lole pire. Manono obedo giamia ka Rubanga.

²⁰Dano nono likame bino bedo kede par moro pi ceko me kuo mere i wi lobo, pien Rubanga omie epong kede yomcuny.