Read kumam Ngarab kop 8 Bible Online

Ngarab kop 8 - kumam bible

Ngarab kop 8

¹Ngai kame cal bala ngarieko? Doko ngai kame ngeo gonyo dwong kop me gi dedede? Rieko mio dano nyero mukemuke, doko emio nyim kame oudo orurujun doko ber.

²Tim gikame abaka waco piento in ikwongere but Rubanga be ibino timo kamanono.

³Yai tenge ki nyim abaka ka kop nono likame ber ne, kur igali, piento en etimo gimoroni kenekene kame cunye mito.

⁴Kop kame abaka waco obedo kop me ajikini, doko likame tie ngat kame karuno penye be, “Pinyo komio in itie timo kamano?”

⁵Ngat kame lubo cik ka abaka likame udo peko moro, doko ngat ariek ngeo kare kede epone me timo gikame poore.

⁶Bed bala jo tie kede pekini kame dio gi, do gi dedede tie kede kare kede epone me timo gi.

⁷Ateteni jo likame ngeo gikame bino timere i kare me anyim, doko likame tie ngat kame waco negi.

⁸Likame tie dano moro kame tie kede twer me gengo to mere arabo me loko ceng me to mere. Manoni en yi kalikame wan okaruno bwot kiye, akadi jo kame timo tim areco da, tim gi nogo likame twero lako gi.

⁹Ango aneno magonogi dedede, di aketo tam na i kom gi dedede kame jo timo i piny kan, piny kame jo mogo tie kede twer i kom jo icegun di kiko mino gi kineno can.

¹⁰Ango atieko neno jo areco di koyiko kede wor, aso di gin en kame oudo kibedo dodonyo i kabedo kacil, di do nan oko pako gi i bomba kame gin oudo kibedo timo iye gikareco nogo. Manoni da kony mere li.

¹¹Ka likame komio jo alola awakawaka pi gikarac kame kitimo, cuny jo bedo i timo gikarac.

¹²Bed bala jodubo tim dub tien tol acel di kiko bedo kuo pi kare kalac, ango angeo be jo kame lworo Rubanga bino bedo kiber pien gin kiwore.

¹³Do jo kame timo gikareco likame bino bedo kiber, doko likame kibino medo kare me kuo gi bala tipo me ot, pien gin likame kilworo Rubanga.

¹⁴Tie gimoro ace kalikame kelo nango niang. Tie jo mogo abeco kame kotero iepone kame kotero kede jo areco, doko tie jo mogo areco kame kotero iepone kame kotero kede jo abeco.

¹⁵Manoni en komio ango awaco be dano miero bed kede yomcuny, pien likame tie gimoro kame ber ne jo i piny kan, kame lo cam, kede amata, di kiko yomo cuny gi. Manoni gin kiromo timo di kilole kede kuo kame Rubanga omio gi i piny kan.

¹⁶Kakame ango atamo kede mito udo rieko, kede mito neno gikame timere i piny kan, ango ako niang be dano twero bedo iwor kede iceng di likame enino,

¹⁷di likame eko karuno udo niang i kom gikame Rubanga tie timo. Akadi bed bala ecane benyo, do likame ebino udo. Jo ariek sidiko be gin kingeo, do likame kingeo gimoro.