Read kumam Ngarab kop 9 Bible Online

Ngarab kop 9 - kumam bible

Ngarab kop 9

¹Ango ako kano kope nogi dedede i cunya, di ako ngingico gin dedede, kite kame jo ariek kede jo areco, karacel kede tice gi tie kede i cing Rubanga, akadi amara gi kede adagadaga. Likame tie ngat kame ngeo gikame ebino riamo kede.

²Apokapoka moro li. Gi acel nono poto i kom jo dedede, i kom jo kopoore kede i kom jo kame ikiteso gi reco, i kom jo abeco kede i kom jo areco da, i kom jo kalikame opwokere kede i kom jo kopwokere, i kom jo kame mio giayala kede i kom jo kalikame mio giayala. Jo abeco kotero rom aroma kede jodubo; jo kame kwongere rom aroma kede jo kame dagi kwongere.

³Mano en gikarac kame timere i piny kan, en ine be, gi acel nono poto i kom jo dedede. Bobo da cuny jo dedede opong kede tim areco kede me poi i kare kame gin kikuo kede; ingei manono di do gin kiko to.

⁴Do ngat kame kuo tie kede gen, pien ogwok akuo ber elo engu oto.

⁵Ebo, jo akuo ngeo be gin kibino to, do jo oto likame ngeo gimoro; gin likame bobo kiudo giamia moro me pwoc, doko wi jo da wil kede gi.

⁶Amara gi, adagadaga gi, ingobel gi to karacel kede gi. Gin likame bobo kitie kede gi me atima i kom gimoroni kame timere i piny kan.

⁷Oti icam giri cam ni kede kilel, di iko mato bwini ni kede yomcuny, pien Rubanga oudo otieko yei sek be in ipoore timo kamanono.

⁸Ngap igoen acil di iko sut kede mo.

⁹Cam kuo kede dako kame cunyi maro, pi kare dedede me kuo ni kame kony mere li nono, kame Rubanga omi i piny kan. Manono en kame kopoko ni i kuo noni pi timo, i kare kame ilole kede i piny kan.

¹⁰Gimoroni kenekene kame in itimo, poore itime kede teko ni dedede, pien i kabedo me jo oto, kakame in itie ot iye kunono, likame tie tic moro, tam arabo ngec, amoto rieko.

¹¹Ango bobo ako neno be i piny kan, nakanaka jo adwir en kalikame lo elagano me ringo, doko jo atek en kalikame lo yi. Jo ariek en kame nakanaka li kede gikame kikuo kede, doko jo atie kede adam ariek en kame nakanaka likame baro, akadi jo ipirana da likame komio ruom amalo. Gikame timere but gin lubo kare kede winyo kame poto ne dano.

¹²Likame tie ngat kame ngeo kare kame peko bino poto ne kede. Jo cal bala aporogo kame moko i bwoi, arabo winy kame moko i owic. Peko ngole poto i kom gi bala owic.

¹³Ango atieko neno da bobo i piny kan, anyut me rieko kame ango oudo aneno bala ber twatwal.

¹⁴Bomba moro oudo tie kame jo nonok iye. Abaka moro atek oko bino pi sure. Abaka nono oluke di eko iikere pi turo apama me cel mere.

¹⁵I bomba nono oudo tie acan moro ariek, di en eko tic kede rieko mere pi lako bomba nono. Do likame tie ngatamoro oko yutuno en.

¹⁶Ango ako waco be, “Rieko lo teko; aso di rieko me ngacan kocao, doko kope mege likame kowinyo.”

¹⁷Kope kame ngat ariek waco momot poore awinya, eber elo ilelem me ngapug aming.

¹⁸Rieko ber elo jamini me yi, do dub acel dudubo jamini atot abeco.