Read kumam Wer amit 2 Bible Online

Wer amit 2 - kumam bible

Wer amit 2

¹Ango abedo ature me Saron, ature lili me aditot.

²Bala ature lili atie i diere me ocokocok, apa na da cal kamanono i diere me mon apat.

³Bala olemo atie i diere me yen apat i abum; opa na me amara da cal kamanono i diere me awobe. Ango cunya maro bedo i tipo mere, anyakini mere mit nango.

⁴En etera i ode me camo ebaga di eko uma kede amara mere.

⁵Mia acam olok otuo aud kede teko, mia olemo agony kede olo; pien amara otieko cunya.

⁶Cinge tetu ngodal ango ateno iye wia, di cinge tetu cam gwaka.

⁷Akwao wun mon me Yerusalem lairunu i nying atil kede i nying amiem[1] be likame ibinunu totolo amara wa, tuno en romo wa.

⁸Atie winyo dwan opa na! Nenunu, etie bino. Etie ringini engolo wi mori, etie kalamo imukuran.

⁹Opa na cal bala atil arabo bala amiem apwodi titidi. En ica etie cungo i nget apama. Etie neno yi ot ki dirisa, etie ngino yi ot ki epiding atwolo.

¹⁰Opa na tie yamo keda. Bia, apa na bia; apa na me amara bia ooti.

¹¹Kare me ngico otieko kato, kot otieko weko cwei.

¹²Ature oromo kabedo dedede, man en kare me wer. Wer me aweleko winyere i lobo wa.

¹³Anyakini me epigi ocako cek, olok da tie tuuro; ngwece me ature gi kur. Apa na me amara yai, yai ooti.

¹⁴Okwe awele na ipwono kakobarere me lela. Mia anen wangi, mia awiny dwani. Pien winyo dwani mit, doko da wangi cil.

¹⁵Mak ne wa ikween, ikween apwodi tino. Gin kidudubo poto me olok, pien olok wa tie tuuro.

¹⁶Opa na en mera, ango da en mere. En ekwao romini mege i diere me ature lili

¹⁷tuno di koyo me ru piny okuto di colpiny oko rwenyo. Dwogi, in opa na me amara, bala atil, bala amiem atidi atie i wi mori me Beter.