Read kumam Wer amit 3 Bible Online

Wer amit 3 - kumam bible

Wer amit 3

¹Iwor di atie i kabuto na oudo amo ngat kame amaro; amoe do likame ako ude.

²“Nan ango ayaro yai di ako ot i bomba, i yote mege kede kabedo kame jo cokere iye; Abino mono ngat kame cunya maro nono.” Amoe do likame ako ude.

³Jo kame daro bomba oko wuda kakame oudo kitie mamano kede bomba. Ango ako penyo gi be, “Inenunu opa na kame cunya maro?”

⁴Cucuto kakame ango akato gi kede, ango ako udo opa na kame cunya maro. Ango ako lide i kome di ako dagi ne ot paka tuno ako tere i ot ka toto na i agola me ngat koyaca.

⁵Akwao wun mon me Yerusalem lairunu i nying atil kede i nying amiem[2] be likame ibinunu totolo amara wa, tuno en romo wa.

⁶Ngai ine atie bino ki wi tim bala yiro aswiridido duny, di kome ngwe kur bubani kede mura, moe angwe kur kame jocat wil cato?

⁷Nenunu, kotie tingo Sulumani kede itanda me angosibib! Cuo ot kanyape oluke, gin en cuo atek kalamo i Isirael.

⁸Gin dedede kimako ipimai di kitie kede diru me yi. Ngat acelacel kikom gi otweo epima mere i piere pi kuro asura kame twero timere i dier iwor.

⁹Abaka Sulumani otimo gi me yene kede ibaon me yen me Lebanon.

¹⁰Ipirin mege kopuco kede siliba; ngee kotimo kede egoe kame kolilingo kede saabu. Kateno wic mere kotimo kede egoe akwakwar, yie mon me Yerusalem en kotubuso i yore kame nyuto amara.

¹¹Mon me Sion bianu inenunu Sulumani. En etie ngapo ocoro me ajakanut kame toto mere orwako i wie i ceng kame enyomere kede, i ceng kame cunye oudo modomodo kede.