Read kumam Wer amit 4 Bible Online

Wer amit 4 - kumam bible

Wer amit 4

¹Apa na me amara, in tin icil benyo, in icil twatwal! Wangi meny bala me awele i egoe kame iumo kede wii. Yer me wii ineno bala ekodet me diegi, atie wok piny i aditot me Gilead.

²Laki tar bala romini amon kame pwodi konyaro anyara yer kom gi, di oko lwoko gi. Gin dedede kitie likame tie korwenyo, acelacel kede ngawote.

³Del me dogi cal bala ausi akwar, dogi neno ber adikinicel. Lemi tunituni cal bala dul me anyakini me pomagurunet, di kitie i egoe kame iumo kede wii.

⁴Nguti cal bala gedo ka Daudi abor malo, kame konapo apama mere enyiriri enyiriri. Mwola me ngut liero iye bala ibukui tutumia, gin dedede ibukui me jo yi.

⁵Tune ni cal bala idwe me amiem are, itilio are atie cam i diere me ature lili.

⁶Ango abino dong bedo i wi emukura me mo mura, i wi emukura me odok aduny ngwe kur tuno koyo me ru me piny buko, tuno di colpiny orwenyo.

⁷Apa na, in tin icil benyo; likame tie karamoro arac i komi!

⁸Ateran na, yai ki moru me Lebanon ibin buta, bia buta ki moru me Lebanon. Wok piny ki moru me Amana, ki moru me Senir kede ki moru me Kerimon, kakame inguon kede irisai bedo iye.

⁹Amina, ateran na, neeno ni kede mwole me nguti owao cunya.

¹⁰Amara ni tin mit benyo, in amina, ateran na! Amara ni ber kalamo bwini, doko da moe nin ngwe kur kalamo gi dedede atie kede ngwece amit.

¹¹Ateran na del me dogi winyiwinyi bala mokic; lebi cal nango bala cak kede mokic. Igoen nin ngwe kur bala ngwece me Lebanon.

¹²Amina, ateran na cal bala poto kame kocelo; poto kame kogwao kede apama, atan kame koluko,

¹³kanono yen dongo iye. Gin kidongo bala yen pomagurunet di kiko nyako anyakini abeco kalamo. Ngwece akur me mo kena kede nadi tie kanono,

¹⁴kede me moe sapuron, kalamus, kede sinamon, kede yen me egere dedede me odok angwe kur. Yen me mo mura kede aloe dongo kanono, kede yen ace me moe angwe kur kalamo.

¹⁵In atan abido poti, esamai me pii amol, pii anyete wok ki wi mori me Lebanon.

¹⁶Yamo abuko me bad tetu malo, cei! Yamo abuko wok ki bad tetu piny, bia! Buki i poto na tetekeny isarakino ngwece akur atie iye. Poore opa na me amara bin i poto mere di eko camo anyakini abeco kalamo atie iye.