Read kumam Wer amit 5 Bible Online

Wer amit 5 - kumam bible

Wer amit 5

¹Ango atieko donyo i poto na, amina, ateran na. Atie coko mura na kede yen angwe kur; atie camo mokic na kede apien mere; atie mato bwini na kede cak. Camunu, wun adiereson, matunu tuno wun mer kede amara.

²Ango oudo atie nino do cunya oudo neeno. Ako leko be opa na oudo tie twotwomo ekeko di ewaco be, “Amina, apa na me amara, yab na ekeko, awele na, apa na aber adikinicel. Pien wia odiak kede toyo, yer wia tie cwer pii pi ngico me iwor.”

³Ango atieko gonyo igoen na; pinyo amio angap gi bobo? Ango atieko lwoko tiena; pinyo amio doko apwok gi?

⁴Opa na ocwao cinge i kakatwolo, cunya oko donyo gwere kitek pire,

⁵ango ako yai pi yabo ne opa na ekeko. Mo mura oudo odiako cinga, mo mura oudo tie cwer acwera ki lweta kakame amako kede agilu me yabo ekeko.

⁶Ango ako yabo ne opa na ekeko, do opa na oudo otieko lokere odok. Kuo na kony mere oko doko li pi manono. Ako mone, do likame ako ude; alwonge, do likame egamo doga.

⁷Jodar koudo tie mamano bomba oko wuda; gin kiko jwata paka luny; jodar apama me bomba nogo oko tero egoe na me um.

⁸Akakasaro but wu wun mon me Yerusalem be, kame iudunu opa na, wacunu ne be par otieko teko na.

⁹Dako acil kalamo mon apat, nyo kamio in iparo be opa nin do pire tek kalamo jo apat? Nyo kame pire tek kibute, en komio in ikakasaro but wan kamano?

¹⁰Opa nango kome yot di ecil, en engere akadi kikom cuo tutumia tomon.

¹¹Wie cil bala saabu kame kojililo kiber, yer wie daudau di col bala agak.

¹²Wange cal bala aweleko, aweleko kobam i cak di kiko donyo cungo i dog ataneko.

¹³Leme neno ber bala poto, poto me yen angwece gi mit. Del me doge cal bala ature lili, di eleny kede mo mura aliu.

¹⁴Bade cal bala ikong me saabu kame kodudupo iye kide me wel. Kome cal bala gikame kotimo kede lak liec di oko tubuso en kede kidi sapir.

¹⁵Tiene cal bala ipirin me kidi alabasita, kame dud gi cungo i wi saabu. En ecungo ineno bala mori me Lebanon, kede yen seda gi kame wi gi bocoboco.

¹⁶Noto doge mit gi dedede me kuo mere ber nango. Mon me Yerusalem Manoni en opa nango kede adiera.