Read kumam Wer amit 6 Bible Online

Wer amit 6 - kumam bible

Wer amit 6

¹Dako acil kalamo mon dedede, opa ni me amara ooto tuai? Wac ne wa yongayo kame opa ni olubo, me wek okonyi mone.

²Opa nango ooto i poto mere i poto me yen angwe kur. En etie kwano romini mege i poto kunono di ecoko ature me lili.

³Opa na en mera, ada abedo mere; en ekwao romini mege i diere me ature lili.

⁴Apa na me amara, in icil bala bomba me Tirisa neni ber bala Yerusalem, in iwao cuny dano bala neno isirikalen atie sirito kede imendera.

⁵Lok wangi tenge kibuta, pien kisupo cunya i komi adikinicel. Yer me wii cal bala ekodet me diegi atie wok piny ki emukura me Gilead.

⁶Laki tar bala romini amon, kame pwodi kolwoko kom gi nyen. Gin dedede kitie likame kimuk, kiupere are are, me malo kede me piny.

⁷Lemi cal bala anyakini me pomagurunet kame kopoko ki diere, di kitie i egoe kame iumo kede wii.

⁸Abaka bed kede mon ot kanyape kame enyomo, kede ot kanyauni kalikame enyomo, kede anyira ace atot kalikame marere.

⁹Do awele nango, eber adikinicel, en acel kenekene, toto mere mare adikinicel. Konywale abongo karamoro arac i kome. Anyira onene oko cako ne be etie kede yomcuny; mon ka abaka kame enyomo kede kalikame enyomo da kamanono, di gin dedede kiko pake.

¹⁰Ngai ine kame ngibuco neeno bala ru me piny? Ecil bala duwe, erieny bala ceng, ewao cuny dano bala neno isirikalen asirito kede imendera.

¹¹Ango ako ot i poto me anyakini angee tek, pi neno ka yen me aditot otuuro; pi neno ka olok olibo, kede ka pomagurunet oudo otuuro.

¹²Koma tie miel amiela; in imio cunya tie kukudo ango pi amara, bala kame ngat aringo kede cabala cunye kukudo en kede pi yi.

¹³Bia, dwogi in nyako kacil me Sulam, tetekeny angii. Pinyo komio imito ngina, bala atie miel i diere me jo koriere tuni tuni?