Read kumam Isaya 1 Bible Online

Isaya 1 - kumam bible

Isaya 1

¹Itabu noni obedo kope kame Rubanga omio ongere but Isaya wot ka Amos, kamako Yuda kede Yerusalem, i kare me apugan ka Usia, Yotam, Akas kede Esekia bala abakai me Yuda.

²Rwot owaco be, “Okwe wi lobo kede malo, winyunu gikame atie waco! Ango apito idwe paka dongo di kiko lokere jemo na.

³Twon ngeo wone, doko punda da ngeo kakame ngadwong mere pite kiye; do jo me Isirael likame ngea. Jo na likame tie kede niang moro.”

⁴Itie i can, in ateker angadubo, wun jo kame dub onuo, lwak arac, idwe kotieko dubere. Wun itiekunu weko Rwot; itiekunu dagi Ngat Kacil me Isirael, itiekunu loko ne ngei wu.

⁵Pinyo kara pwodi imeedenu ameda kede dub? Benyo, pwodi itienu mito ebela? Nenunu, aporeso otieko romo wi wu lung, cunyu da tie kede aramo.

⁶Cako ki tienu piny tuno i wi wu malo likame tie karamoro aber; komu dedede opong kede aporeso, kede kakoyure, kede buge acwer. Likame ngatamoro olwoko buge nogo akadi twetweo gi da; likame kowiro gi kede yat.

⁷Pinyu otieko dong nono, kotieko wango bomban wu kede mac. Jokumbor omao lobo wu di wuda itienu neno di kiko dudubo en; edong nono abongo jo iye.

⁸Yerusalem odong bala kima kame koweko i poto me olok; bala tipo kame kotagalo i poto me ikwekwer; bala bomba kame jokwor oluko.

⁹Ka koto Rwot me jo yi likame oudo oweko jo mogo odong kuo, oudo koto Yerusalem odoko cal bala bin Gomora kede Sodoma.

¹⁰Yerusalem, jopug ni kede jo ni cal acala bala bin jo me Sodoma kede Gomora! Winy gikame Rwot ni tie waco ni; cik yiti i kom pwony kame Rubanga wa tie mini.

¹¹En ewaco be, “Twon giayala wu go kony gi nyo kibuta? Romini kame ingolunu me giayala kede kakamio me leini otieko roma; likame doko cunya mito remo me giayala me twonin kede me romini kede me diegi.

¹²Ngai oudo openyo wu pi kelo magonogi dedede ka itienu bino wora? Kur doko tienu kara nyon tempulo na!

¹³Kony mere li me wun kelo giamia wu. Ngwece me odok angwe kur kame i dunyunu otieko doko gi me kwer buta. Likame doko ango atwero kanyakino gikareco kame itimunu i Ebaga me Por Duwe, kede i ceng Sabato, kede i kare ace me cokere wu me edini.

¹⁴Ango cunya dagi Ebaga wu me Por Duwe kede ceng adongo ace; gin kitie nango bala yec kame ango atieko ol yeno.

¹⁵“Akadi bed bala itingunu cingu ilega, ango abino ngoloro tenge; akadi bed bala ilegunu tien adi, do ango likame abino yei winyo kwac wu, pien remo me nek opwoko cingu.

¹⁶Lwokerenu idokunu cil; jikunu timo tim areco i wanga; ebo, jikunu tim areco

¹⁷di ikounu pwonyere timo gikame ber. Nenunu be itimunu gi dedede i yore me ateni di ikounu lako jo kame kotero kirac, kede ikounu gwoko twero me idwe kic, kede ikounu konyo apuserun.”

¹⁸Rwot waco be, “Nan do bianu oporunu kop. Akadi bed bala dub wu opwoko wu ibokerenu bubu, do ango abino lwoko wu ikounu doko tar bala akako, akadi bed bala kikwar bala remo, kibino doko tar bala epamba.

¹⁹Ka iyeunu bedo jo kame lubo kop na, ibinunu camo jamini abeco kame lobo noni ceko.

²⁰Do ka idagunu ikounu lokere jemo na, ibinunu to to me epima. Ango Rwot en awaco.”

²¹Bomba kame oudo genere odoko cal bala malaya. Bin sek tice kame kotimo i yore me ateni kede tice kopoore en oudo tie iye, do nan do jonek en olunyo bedo iye!

²²Yerusalem, in oudo ical bala nyonyo siliba, do nan do idoko cete me nyonyo; oudo ical bala bwini aber, do nan ical do bala bwini kame konyalo kede pii.

²³Jotel ni odoko jojemo kede jowot jokuwo. Gin tic gi do gamo giamia kede cemusana. Likame kingolo kop i ateni pi koto konyo idwe kic amoto apuserun.

²⁴Pi manono, nan winyi, Rwot me jo yi, Rubanga atek me Isirael tie waco be, “Twon can! Abino bwoto lilo na i komi, in ngakwor na, di ako culo kwor i komi!

²⁵Ango abino timo ni can. Bala kame kotwako kede nyonyo di oko jililo en pi lonye, ango abino lonyi i yore me kwanyo cete tenge ki komi.

²⁶Abino mino ibedo tie kede jopug kede jo amio tam acal bala kame oudo bin itie kede sek, ingei manono kobino lwongo Yerusalem be bomba me jo kopoore kede kame genere.”

²⁷Pien Rwot timo gi dedede i ateni kede i yore kopoore, en ebino lako Yerusalem kede jo mege dedede koswilaro.

²⁸Do jojemo kede jodubo en ebino muducaro gi karacel; en ebino neko jo kame weke.

²⁹Lewic bino mako wu pi yen kame iworunu kede pi poti kame ikwerunu but rubangan.

³⁰Ibinunu doko cal bala yat oak kame pote mege ner di ony; bala poto ali kede pii iye.

³¹Bala kame ibiriti cwinyo kede lum otuo, kamanono da jo atek tice gi areco bino cwinyo gi kiko amuducar; likame tie ngatamoro kame bino twero konyo gi.