Read kumam Isaya 21 Bible Online

Isaya 21 - kumam bible

Isaya 21

¹Man en kop kame kowaco i kom wi tim kame tie i nget nam adwong. Bala kame apipiru wokun kede ki wi tim me bad tetu piny, tie can moro atie bino kamanono ki lobo me alwora.

²Aneno gianyuta moro aneno rac twatwal, en gianyuta me duporo kede muducaro. Elam, yai iko ot suro! Mede, lukaro bomban me jo Babilon! Rubanga tie jiko cur kame Babilon obedo kelo.

³Gikame aneno nono oko mina aramo i cunya, aramo acal bala me dako atie ramere me nywal. Manono onyonga, doko edubo cunya omio likame atwero winyo akadi neno gimoro.

⁴Wia winga, twon lworo otieko neko koma; mumuso me piny kame oudo abedo kuro olokere odoko gikame kelo na mielkom.

⁵I gianyuta nono, oudo koiko cam me ebaga, di oko peto ikeka me bedo me wele. Gin oudo kitie cam kede amata, di ngatamoro oko ngole redo be, “Yaunu, wun jodongo me isirikalen! Iikunu ibukui wu!”

⁶Di Rwot oko waco na be, “Oti icwai ngat akio piny, di iko waco ne pi mino kop i kom gikame eneno.

⁷Kame eneno jo kame ringo kede asigiran di kitie bino are are, kede jo kame ringo kede pundan, kede jo kame ringo kede aguraguran, poore ecik yite bed bit.”

⁸Di ngat akio piny nono oko redo be, “Rwot, ango abedo cungo iwor kede iceng malo kan i wi gedo abor me ngingio piny.

⁹Nan atie neno gin ika kitie bino jo are are, di kitie ringini kede asigiran!” Di eko waco be, “Epoto, Babilon otieko poto; caljwogi dedede otuturun tie buto piny.”

¹⁰Jo na me Isirael, wun kotieko canyo wu di oko pieto wu bala engano, do nan ango atie waco ne wu rwonge aber kame ango awinyo kibut Rwot me jo yi, Rubanga me Isirael.

¹¹Man en kop kame kowaco i kom Edom. Ngatamoro tie lwonga ki Edom di epenya be, “Ngakino piny, piny oyapuno ru ya? Wac na ka piny oyapuno ru.”

¹²Ango ako dwoko be, “Piny bo oyaro ru, do ebino bobo yuto. Ka imito, iromo bobo dwogo iko medo penyo.”

¹³Man en kop kame kowaco i kom Arabia. Wun jo me Dedan kame tie i sapali, ibinunu cokere buto i dud okuto mogo acegocego me wi tim me Arabia.

¹⁴Miunu jo kame orio oneko pii ka kibino butu. Okwe wun jo kame bedo Tema, kelunu mugati ne jo koringo ayela.

¹⁵Pien gin kiringo aringa ki epima kede ki emal kame kotieko telo pi gweno, kede ki can kame yi kelo.

¹⁶Rwot oko waco na be, “I kare me mwaka acel udo deyo me Kedar otieko jik bala kame tic kame dano opatano pi timo pi mwaka acel jik kede.

¹⁷Jo yi mege anonok kenekene en kame bino dong kede imalia; ango Rwot Rubanga me Isirael atieko waco.”