Read kumam Isaya 23 Bible Online

Isaya 23 - kumam bible

Isaya 23

¹Man en kop kame kowaco i kom Taya. Kokunu wun imerin me Tarusi, pien kotieko dudubo edoket kame iwokunu iye i bomba me Taya. Iwinyunu kop noni kakame oudo itienu dwogo kede ki Sipuro.

²Tururunu wun jocat wil me Sidon, wun jo kame bedo i dog nam adwong. Icwaunu jo wu ngolo name adongo;

³gin kingolo twon pie pi wilo kede cato engano me Sikor, kame kopuro i dog ecilet me Nail; oudo icatunu wil kede atekerin atot.

⁴Lewic miero maki, Okwe Sidon, pien nam oyamo, kabedo kame koluko kede cel atek i dog nam adwong owaco be, “Ango likame abilo ramere me nywal, likame ango apito atin awobi moro amoto nyako moro.”

⁵Kame kop noni otuno Misiri, kibino bedo kede par alit pi gikame otimere ne Taya.

⁶Wun jo kame bedo i dog nam adwong kokunu, ngolunu loka Tarusi.

⁷Benyo, kom manoni en bomba wu amalo me kicel kocakere riki sek, bomba kame jo mege mogo osarakin ot bedo i pinye apat?

⁸Ngai inonini kotimo iik noni i kom Taya, bomba kamio ocoro me pug, bomba kame jocat wil mege obedo jopug kame koworo ki wi lobo lung?

⁹Rwot me jo yi en otimo iik noni, pi jiko wakere gi pi deyo kame kitie kede, kede pi kelo lewic i kom jo kame koworo i wi lobo lung.

¹⁰Dokunu i lobo wu, wun imerin me Tarusi; pien edoket kame lem iwokunu iye noni otieko doko li.

¹¹Rwot orieo bade i wi nam adwong eko rereto ajakanuto; en emio cik me tuturo kacat kede kawil kame tie kede cel me apamai atek i lobo me Kanan.

¹²En ewaco be, “Yomcuny kame lem itie kede otieko jik, in bomba me Sidon, doko da kotieko dino jo ni piny atwal. Akadi ka iyai di iko ngolo loka Sipuro, do i kunono da likame ibino udo wei moro.”

¹³Nenunu gikame Asiria otimo ne Babilon! Gin kimie edoko kabedo me leini me obar; kisuro Babilon di kiko kumemo kayito i wi apama mere me cel, di kiko tuturo miere me abaka di eko doko ameje.

¹⁴Kokunu wun imerin me Tarusi, pien kotieko dudubo edoket kame iwokunu iye i bomba me Taya.

¹⁵Wic bino wil kede bomba me Taya pi mwakini ot kanyaare, manono rom aroma kede kare me kuo me abaka. Ingei mwakini ot kanyaare, Taya bino bedo bala malaya kame kowero be:

¹⁶Kwany adungu ni, ririmo bomba, in malaya kame wic owil kedi! Goi goc amit di iwero were amit, tetekeny cuo dwog buti.

¹⁷Kame mwakini ot kanyaare otiek, Rwot bino mino Taya dok i tic mere me woro caljwogi bala bin sek, di eko bino doko bala malaya atimo caro kede ajakanuto dedede atie i wi lobo.

¹⁸Jamini kede magoba kame en ebino udo ki tic mere me woro caljwogi likame bino bedo i cinge, do ebino mino gi but Rwot, di jo kame woro Rwot ko bino tic kede gi me wilo cam kede igoen aromo gi.