Read kumam Isaya 24 Bible Online

Isaya 24 - kumam bible

Isaya 24

¹Rwot bino dudubo wi lobo di eko mine edong nono. En ebino nyonyobo wi lobo di eko sarakino jo kame bedo iye.

²Jo dedede bino beo i peko di rom aroma, josaseredoti kede jo ajoa, ipasoi kede jodongo gi, nyako ngatic me ot kede min ot, jowil kede jocat, jo kame kopo jo jame kede jo kame kopao kibut gi, wegi abar kede jocan.

³Kobino mino wi lobo kony mere doko li atwal atwala di eko dong nono atwal atwala. Manoni en kop kame Rwot owaco.

⁴Wi lobo oner di eko tuo, piny lung odoko goro; bero me malo kede wi lobo karacel odok do cen acena.

⁵Lobo omunaun pien jo kame bedo iye oturo iswilia ka Rubanga, doko da kiko dagi gwoko isikan kame en etimo kame bedo nakanaka.

⁶Pi manono, Rubanga olamo lobo; jo kame bedo iye tie neno can pi raco gi, gin kitie meede ameda doko nok.

⁷Olok tie tuo i poti, bwini tie doko nok, jo dedede kame oudo cuny gi yom nan tie cur.

⁸Koko me ayekeyeke otieko ling, icelakin me jo atie kede kilel otieko jik, koko me arigirigi da li.

⁹Likame doko jo mato bwini di kiwero, bwini bino doko kec kalamo but jo kame mate.

¹⁰Bomba do tie atatai; ude duc ocegere likame tie ngat kame twero donyo iye.

¹¹Koko tie i dier yote me bomba pi li me bwini; kilel dedede otieko jik, yomcuny likame do tie i wi lobo.

¹²Kodudubo bomba, kotiatiao irutei mege piny.

¹³Manoni en gikame bino timere ne atekerin dedede atie i wi lobo. Ebino bedo bala i kare me ngwedo olok, bala kame kotieko tengo anyakini me olok dedede piny, di oko donyo dedepo anyakini acelacel kodong malo.

¹⁴Jo kame bino dong bino wer kede kilel; jo me bad tetu tim bino woo kitek di kiwaco dwongo ka Rwot.

¹⁵Jo me bad tetu kide bino pako Rwot di kimie dwongo; jo kame bedo i dog nam adwong da bino pako Rwot, en Rubanga me Isirael.

¹⁶Wan obino winyo were me pak, me mino Ngat Kopoore dwongo di wok ki ajikini me wi lobo. Do ango atie i can! Atieko ol. Jo tie timo tice kalikame nyuto genere, tice nogo tie meede ameda.

¹⁷Wun jo kame bedo i wi lobo, tim akelo lworo kede buge kede obek tie kuro wu.

¹⁸Ngat kame bino ringo pi gikame kelo lworo bino poto i bur, kede ngat kame poto i bur di eko wok en ebino moko i obek. Kobino yayabo dirisan me malo di acakini me dud lobo do donyo yangere.

¹⁹Wi lobo bino yangere kirac di eko babarun di eko nyinyilun.

²⁰Wi lobo bino gete di eyangere bala dano omer, ebino pure bala kima kame yamo puo. Dub onuo lobo, en ebino poto di likame eko bobo twero yai.

²¹Kare tie bino kame Rwot bino keto kede alola i kom twer mogo atie i malo kede abakai me wi lobo.

²²Kobino coko gi i bur karacel bala mabus di oko cego gi iye. Ingei kare moro en eko bino mino gi alola.

²³Di do lewic ko bino mako duwe kede ceng; pien Rwot me jo yi bino pug ki Yerusalem, ki wi moru me Sion, di joadongo mege ko bino neno deyo mere.