Read kumam Isaya 25 Bible Online

Isaya 25 - kumam bible

Isaya 25

¹Okwe Rwot, in en Rubanga na; ango abino mini dwongo di apako nyingi. Pien in itieko timo jamini me aura; in ibedo kede genere di iko cobo iik ni kame oudo itimo riki sek.

²In ituturo bomban ka jokwor wa odoko atukit, bomban kame kocelo kede apamai atek opopoto. Miere me abakai kame jokwor wa oudo ogero otieko doko li atwal.

³Pi manono, jo me atekerin atek bino paki; jo me bomban me atekerin ager bino lwori.

⁴In en kakame jocan ringo ot gwokere iye, kakame jo kame piny oloo ringo iye i esawa me peko. Kakame jo ager onyongo wa kede bala kot acwei kede yamo, arabo bala ceng odop pepe i dier i ceng, in iko bedo bala kagwok wa.

⁵Woo me jokumbor amito suro wa otuno ne wa bala lieto me piny kotuo, do in iko bedo bala edou kame galao lieto me ceng di likame eko tuno i kom wa; igengo jokwor wero were me bwono yi.

⁶I wi moru me Sion kan, Rwot me jo yi bino iiko ebaga pi atekerin dedede, ebaga me cam abeco kede bwini ocek di mit. Kobino toko ringo kame isum tie iye kede gabo bwini kame kojililo.

⁷I wi moru kanoni en ebino nyinyilo egoe me aika koumo atekerin dedede.

⁸Rwot me jo yi bino muducaro to atwal. En ebino weno tenge pigewang jo dedede, di eko kwanyo tenge lewic kame jo mege obedo yeno i wi lobo lung. Rwot en owaco!

⁹I kare nono, jo dedede bino waco be, “En ebedo Rubanga wa! Wan oudo obedo kure kede gen pi lako wa. Manoni en Rwot kame wan oudo obedo geno, nan obedunu kede yomcuny kede kilel pien elako wa.”

¹⁰Rwot bino gwoko moru me Sion, do kobino nyonyono jo me Moab piny bala gari kame konyono i bur pi timo bolia.

¹¹Gin kibino rierieo bad gi i kanono bala kame jo asanyo rierieo kede bad gi, do Rwot bino tieko ewaka gi bed bala kicane rierieo bad gi.

¹²En ebino tuturo piny apama abor malo kame kocelo kede Moab, di eko rwacakin piny eko doko apua.