Read kumam Isaya 30 Bible Online

Isaya 30 - kumam bible

Isaya 30

¹Rwot owaco be, “Itienu i can wun idwe ajojemo. Wun ilubunu iik wu do likame mera; wun ikoderenu kede ateker apat, do di cunya dagi tim nono, manono omio itienu medo dub i wi dub.

²Wun iyaunu ot mono kony ki Misiri abongo penyo tam nango. Iringunu but abaka me Misiri pi en gwoko wu, Misiri obedo tipo kame wun igaikinunu i dude.

³Pi manono, gwok kame abaka me Misiri mio bino doko ne wu gi me lewic, di Misiri, kame tie bala tipo wu me agaikin do doko gikame dwoko dwongo wu piny.

⁴Akadi bed bala jo kame kicwao otieko tuno i bomban me Misiri kame kolwongo be Soan kede Kanes,

⁵jo me Yuda lewic bino mako gi pi keto gen gi i kom ateker kalikame twero timo negi bero moro, do kwanyo kenekene kelo negi lewic kede acae.”

⁶Man en kop kame Rubanga owaco i kom leini me Negeb. En ewaco be, “Jo kame kocwao ngolo lobo kame beo iye obedo twon peko kede can alit, lobo kame inguon amon kede inguon acuo adorano, kede imosogan kede twole kiyiliyili apor tie iye. Gin kitweo i ngei pundan gi kede aguraguran gi giamia me wel amalo pi tero ne ateker kalikame twero mino gi kony moro.

⁷Kony kame Misiri mio kony mere li, pi manono ango acako ne Misiri nyinge be, ‘Twol kiyiliyili di likame etwero timo gimoro.’ ”

⁸Rwot oko waco na pi giro iwandik i kom kidi ibatalal, di doko ako wandiko en i itabu da, tetekeny ekaruno bedo bala ijura i kare dedede me anyim.

⁹Pien gin nakanaka kibedo jo kame jojemo, jo kalikame genere, jo kalikame yei winyo pwony ka Rwot.

¹⁰Gin kiwaco ne joneno kede ne inabin be, “Kur imuraunu ne wan kope me ateni; wun wacunu ne wan gikame cuny wa mito winyo, akadi bed bala gin likame kibedo kope me ateni.

¹¹Wekunu yongayo nono, paraunu tenge kiye, wan likame bobo omito medo winyo kop i kom Ngat Kacil me Isirael.”

¹²Pi manono, Ngat Kacil me Isirael waco be, “Pien wun itiekunu dagi kop nango, di ikounu keto gen wu i kom tim me gero kede kop me abe,

¹³raco wu noni bino doko ne wu bala kakobele me apama abor malo, koyapuno mine ngole poto esawa moroni kenekene.

¹⁴Ibinunu kayamakin di ikounu ngingidun, bala agulu kame ngingidun di likame iko twero udo akadi abalatigo aromo kwanyo mac da, arabo aromo twomo pii ki akong.”

¹⁵Pien Rwot Rubanga, Ngat Kacil me Isirael owaco be, “Ango abino gwoko wu ka idwogunu buta di ikounu bedo mot, abino mino wu teko ka iketunu gen wu buta mot.” Do wun idagunu di iwacunu be,

¹⁶“Li! Wan obino ringo kede asigiran.” Pi manono, ateteni ibinunu ringo! Iwacunu be ibinunu ringo kede asigiran adwir, do jo kame riamo wu bino bedo dwir kalamo wu.

¹⁷Ngakwor acel kenekene bino mino jo tutumia acel kibutu ringo, jokwor kany kenekene bino mino wun dedede iringunu, tuno di idongunu bala yat me sipo imendera kilekekei i wi moru!

¹⁸Akadi bed kamanono da, do Rwot tie kuro wu pi bedo kede kisa butu, pien Rwot nakanaka timo gikame poore. Kitie kede winyo jo kame keto gen gi i kom Rwot.

¹⁹Ateteni, wun jo me Sion, jo kame bedo Yerusalem, likame doko ibinunu koko. Rwot bino bedo kede kisa butu ka ikokunu bute, en ebino gamo koko wu.

²⁰Bed bala Rwot bino mino peko kede can alit bedo bala cam wu kede pii me amata, do nan en ngat kame ebedo ngapwony wu ebino yecakin ne wu kakaler di eko bedo tie i wangu.

²¹Ka iwekunu yongayo ikounu parao i bad tetu cam amoto i bad tetu ngodal, ibinunu winyo dwane di ewaco kicen ngei wu be, “Yongayo gire ine, derenu.”

²²Di ikounu bino tero caljwogi kame kotimo kede saabu kede siliba bala gi me jwok, di ikounu bino uco gi tenge bala idukun otop di iredunu be, “Irwaunu tenge!”

²³Kame ipurunu kodere, Rwot bino cwano ne wu kot di kiko bino nyak kitek, doko da doke wu bino bedo tie kede lum atot.

²⁴Twonin kede pundan kame puro ecuka bino camo nyige kame kopieto kiber.

²⁵I ceng kame kobino rereto kede gedo aboco malo di oko neneko jo, pii bino mol wok ki wi mori aboco kede ki wi imukuran.

²⁶Rieny me duwe bino bedo rom bala me ceng, di ceng ko bino rieny kede lero akalamo kite kame lem erieny kede tien kanyaare, bala lero kame emio pi ceng kanyaare ka koriribo gi karacel. Manoni bino timere i ceng kame Rwot bino tweno kede wang aporeso kame en ewanakino kede jo mege di eko cango gi.

²⁷Nenunu, Rwot tie bino ki kakabor kede gero mere aliet bala mac, kede edou apek me yiro; kope kame wok ki doge obedo kope me gero, lebe waco kope kame cal bala mac aliet.

²⁸Wei kame wok ki ume cal bala osamai kame pii obelo di eko donyo mol ariram, ariram kame tut mere tuno i ngut dano. En eyeko atekerin di eko muducaro gi, kede etweo del i dog gi me kolo gi tero gi i to.

²⁹Do wun jo ka Rubanga ibinunu bedo kede yomcuny di iwerunu bala kame itimunu iwor me kwero ebaga kacil. Ibinunu bedo kede yomcuny bala jo kame tie ot i bilo kame kotie kuto, me ot i tempulo i wi moru ka Rwot, en ngagwok me Isirael.

³⁰Rwot bino mino dwane me dwongo winyere but jo dedede, di kiko bino neno cinge kame ekiarao malo pi bungo gi, di etie kede gero acal bala mac ager, karacel kede kot acwei di emwomwocun kede yamo atek kede akako.

³¹Kame jo me Asiria owinyo dwan Rwot di kiko nene di etie nyonyoto jo kede ebela mere me lilim, lworo kede mielkom bino mako gi.

³²En ebino ruruco jujuto gi kede ebela mere me mino alola; napunapun me ebela mere bino upere kede twomere me bule kede arigirigi kame jo mege tie gono. Rwot kikome bino yi kede jo me Asiria.

³³Pien Rwot oudo otieko iiko riki sek kabedo me wango kom abaka me Asiria kede twon mac. En etut di elac, di okumemo iye yen. Wei aliet kame Rwot bino kuto ki ume en kame bino moke paka liel.