Read kumam Isaya 34 Bible Online

Isaya 34 - kumam bible

Isaya 34

¹Bianu iwinyunu, wun atekerin dedede; Okwe wun jo me atekerin, cikunu yitu. Kong wi lobo lung kede gi koponge, piny dedede kede jo kame bedo iye winyi.

²Pien cuny Rwot owang kede atekerin dedede kede isirikalen gi; en etieko ngolo negi kop be poore nek gi.

³Kobino uco liele gi di kiko top di ngwece gi ko duny; remo gi bino mol piny ki wi mori.

⁴Jamini kame rieny i malo bino nyote. Malo bino rwenyo bala itabu adola kame kotie dolo, di jamini kame rieny i malo ko bino tuo bala boke otuo me olok, arabo bala anyakini kotuo me epigi.

⁵Ingei epima ka Rwot tieko timo gikame emito timo malo i edou, en do ebino dwogo piny i kom Edom, en ateker kame en etieko ngolo ne kop me muducaro gi.

⁶Remo bino pwoko epima mere, kakamio bino mwono lake, bala remo me idwe romini kede diegi kobedo giayala, kede bala kakamio me engalur me emerekek. Rwot bino mino giayala mere i bomba me Bosira, ebino timo twon nek noni i lobo me Edom.

⁷Idongei ager bino popoto, itobai da bino popoto karacel kede twonin atek; lobo gi lung bino diak kede remo, di mo ko mino lobo bedo di mio amia.

⁸Pien Rwot otieko iiko ceng kame en ebino culo kede kwor, mwaka kame en ebino lako kede Sion.

⁹Isamai me Edom bino lokere doko odok, di lobo ko lokere doko salupa. Piny nono dedede bino doko bala emina atie liel.

¹⁰Mac bino liel iceng kede iwor abongo to, yiro mere bino bedo duny nakanaka. Edom bino doko wi tim ikar kede ikar, doko likame tie ngat kame bobo bino beo iye atwal.

¹¹Ekeng kede ecoc en kame bino lunyo bedo iye; itukirin kede agak bino bedo iye. Rwot bino dudubo en eko doko ameje.

¹²Kobino lwonge be Kakame Ajakanut li iye, jopug da bino bedo li iye.

¹³Okuto kede ocokocok bino dongo i miere me abaka kede i bomban kame kocelo kede apama. Ebino doko kakame ikween wire iye kede kabedo me ikululun.

¹⁴Igwangia bino riamo kede idiekon kunono. Jwogi adiegi diegi bino donyo lwongere ken gi ken gi ki kunono, kede jwogi adako anyinge Lilit bino donyo ot wei iye.

¹⁵Itukirin bino gedo kanono, di kiko nywalo abeon, di abeon ko beko di gin kiko donyo gwoko idwe gi ki kanono. Ikodeta me acut da bino donyo cokere kanono di lubere aluba.

¹⁶Kong mounu ikounu somo i itabu ka Rwot kakame waco be: likame tie acel moro kikom giakuo nogi kame bino bedo li, doko likame tie moro kame bino bedo abongo cware amoto dako mere. Rwot otieko ciko be etimere kamanono, en ebino coko gin karacel kede twer mere.

¹⁷En ebino uco alulu mere me popoko negi kabedo. Lobo nono bino doko mergi di kiko bino bedo iye ikar kede ikar.