Read kumam Isaya 40 Bible Online

Isaya 40 - kumam bible

Isaya 40

¹Rubanga wa waco be, “Kweunu cuny jo na, kweunu cuny gi!

²Yamunu kede mwolo but jo me Yerusalem, wacunu negi be kare me neno can gi otiek do, doko kotieko sasiro gi ki dub gi. Ango atieko mino gi alola kame romo pi dub gi.”

³ Dwan ngatamoro tie lelemo be, “Iikunu ne Rwot yongayo i wi tim, rieunu yongayo adwong ne Rubanga wa i wi tim.

⁴Torunu aditoto dedede; di ikounu pano mori kede imukuran idwokunu piny. Rieunu yote kogomugomun, kede ikounu iiko yote kame gwai dok pwot.

⁵Di do deyo ka Rwot ko bino neeno kakaler, di jo dedede ko bino nene karacel. Rwot kikome en kotieko waco.”

⁶Dwan ngatamoro waco be, “Lelemo!” Ango ako penyere be, “Abino lelemo kop nyo?” Eko dwoko be, “Lelemo be jo dedede cal bala lum; likame kitieko kare kalac bala ature me obar.

⁷Lum ner doko ature da tuwo, ka Rwot ocwao yamo okuto i kom gi. Ateteni jo cal bala lum.

⁸Ebo, lum ner, ature da tuo, do kop ka Rwot Rubanga wa bedo nakanaka.”

⁹Okwe wun jo me Yerusalem, yitunu i wi moru kame bor malo di ikounu tatamo kop aber! Wun jo me Sion, lelemunu kede dwan amalo; tucunu kop aber! Yamunu abongo lworo. Wacunu ne jo me bomban me Yuda be Rubanga gi tie bino!

¹⁰Nenunu, Rwot Rubanga tie bino kede twer, en epugo pi teko mere. Giamia mere me pwoc tie bute, en ebino mino jo mege giamia me pwoc.

¹¹En ebino gwoko romini mege bala ngakwat; en ebino coko idwe me romini karacel di eko tingo gi i kore; en ebino telo toti gi kede mwolo.

¹²Benyo, tie dano moro kotieko pimo rom me pii me nam kede cinge, arabo kotieko pimo rom me idoun kede cinge? Benyo, tie dano moro kotieko coko asinge me wi lobo i gipim, arabo kotieko pimo peko me mori kede me imukuran i misani?

¹³Ngai kame karuno waco ne Rwot gi me atima, arabo kame romo pwonye bala ngat kame mie tam?

¹⁴Ngai kame bin Rwot ooto penyo tam kibute, doko ngai en kopwonye timo gikame poore? Ngai kopwonye bedo kede ngec, arabo konyuto ne epone me bedo kede niang?

¹⁵Kibut Rwot, atekerin dedede rom bala pii kame ton ki agulu, doko kiwekeweke bala apua kame tie i wi misani; neningo, en etwero tingo cula malo bala angwe me apua.

¹⁶Leini dedede kame tie i wi mori me Lebanon ka komio but Rubanga bala giayala awanga, likame kiromo; doko twon yen me wi mori nogo da nonok likame kiromo wango giayala.

¹⁷Atekerin dedede likame tie gimoro i nyime; gin dedede likame kitie gimoro akadi acel.

¹⁸Kokaruno poro Rubanga kede ngai, arabo nyo kame kotwero poro kede cal mere?

¹⁹En likame ecal bala cal apaa kame jopac timo, gikame jotet mwono kome kede saabu di kiko timo ne eriko me siliba.

²⁰Ngat kame ngacan, yero yat kalikame piro. Di do en eko mono ngapac kipirana pi timo ne cal apaa kalikame poto twelekeny.

²¹Benyo, mam wun likame ingeunu? Mam likame pwodi iwinyunu? Benyo, cako i ageini mam pwodi likame kowaco ne wu? Mam pwodi likame iniangunu cako i ageini me lobo?

²²En ngat kame ebedo malo me wi lobo, di eneno jo me wi lobo cal ne bala otwongo; en kame bin eyararo edou bala egoe me isenge, arabo bala eema me bedo iye.

²³En etwero dwoko jopug piny, di eko mino gi kidoko gimoro li.

²⁴Gin kical bala olok kame pwodi kopito apita, di pwodi kitie cako keto aliasin aketa. Ka Rwot ocwao yamo ager i kom gi, gin kiner, di yamo ko tero gi tenge bala cucung.

²⁵Rubanga Ngat Kacil penyere be, “Ngai kame itwerunu pora kede arabo ngai kame rom keda?”

²⁶Tingunu wang wu malo di ikounu neno edou! Ngai kocweo acerin kame inenunu nogo? En ngat kame etelo gi bala isirikalen, en engeo wel gi, doko en elwongo gin dedede kede nying gi; pi teko mere adwong kede pi twer mere, likame acel moro kikom gi otieko rwenyo!

²⁷Okwe wun jo me Isirael, pinyo komio iwacunu be Rwot likame ngeo peko kame wun itienu iye, arabo be likame en eparo kite karac kame kotero wu kede?

²⁸Benyo, wun pwodi likame ingeunu? Mam pwodi likame iwinyunu? Rwot en Rubanga kame bedo nakanaka; en ecweo piny dedede. En likame eol arabo edoko goro. Tam mere tut twatwal, likame tie ngat kame ngeo.

²⁹En emio teko but jo agoro kede but jo kame ool.

³⁰Akadi ipongai da doko goro; jo atino romo ol di kiko poto piny,

³¹do jo kame geno Rwot pi konyo gi bino udo teko kanyen. Gin kibino yararo bwom gi bala ekokom; gin kibino ringo do likame kiol; kibino ot kede tien do likame kidoko goro.