Read kumam Isaya 43 Bible Online

Isaya 43 - kumam bible

Isaya 43

¹Isirael, Rwot ngat kocwei waco be, “Kur ibed kede lworo, pien ango abino laki. Ango atieko lwongi kede nyingi, in ibedo mera.

²Ka ibinunu beo i pii atut, ango abino bedo tie kede wu; peko kame ibeunu iye likame bino bwono wu. Ka ibinunu beo i mac, likame ebino wango wu; akadi leb mac likame bino reno wu.

³Ango en Rwot Rubanga wu, Ngat Kacil me Isirael, ngat kame lako wu. Ango abino mino Misiri bala gi me cul pi lako wu, abino mino Abisinia kede Seba bala gi me cul piru.

⁴Ango abino mino jo bala gi me cul piru, abino jalo atekerin pi lako kuo wu, pien wun ibedunu gi me wel amalo buta, ango amaro wu, doko amio wu wor.

⁵Kur ibedunu kede lworo moro, pien ango atie kede wu! “Ango abino coko jo wu di ako dwoko gi paco, kibino yai ki bad tetu kide kede ki bad tetu tim.

⁶Ango abino waco ne jo me bad tetu malo be, ‘Wekunu gi kioti,’ kede ne jo me bad tetu piny be, ‘Kur icerenu kede gi’; wekunu jo na dok paco yai ki lobere aboco.

⁷Gin en jo na, doko ango acweo gi pi kelo na deyo.”

⁸Rubanga waco be, Lwongunu jo na i ekiko. Gin kitie kede wang gi, do likame kineno piny; kitie kede yit gi, do likame kiwinyo kop!

⁹Miero atekerin dedede cokere karacel. Ngai kikom rubangan gin kame karuno murao kop me anyim kamanoni? Ngai kikom gi kame bin omurao gikame nataman tie timere nogi? Miero rubangan nogi kel jo kame jurao kope gi, wek kiwac ka kope gi nogo tie me ateni.

¹⁰“Jo me Isirael, wun en ijurak nango; ango ayero wu pi bedo jotic na, tetekeny wun ingeanu di ikounu yei ango, kede iniangunu be ango kena en Rubanga. Cako riki sek likame tie rubanga moro ace, doko likame tie moro apat kame bino bedo tie.

¹¹“Ango en Rwot, ango kenekene en kame akaruno lako wu.

¹²Ango riki awaco gikame oudo bino timere, di ango ako lako wu bala kame oudo acikere pi timo. Likame tie rubanga moro me obukui kotieko timo gi noni; wun en ijurak nango.

¹³Ango Rubanga, doko da abino bedo Rubanga nakanaka; likame tie ngatamoro kame karuno mano dano ki cinga; likame tie ngatamoro kame karuno gengo gikame ango atimo.”

¹⁴Rubanga kacil me Isirael, Rwot kame lako wu, waco be, “Piru ango abino cwano isirikalen suro Babilon di kiko tuturo irutei me bomba, di icelakin gi me yomcuny ko bino doko koko.

¹⁵Ango en Rwot, Ngat Kacil. Ango acweo wun jo me Isirael, doko ango en abaka wu.

¹⁶“Ango en kame bin atuco yongayo i dier nam, ayabo kabeo i dier twon pii.

¹⁷Ango en kame bin acwao twon isirikalen i to, cabalan kede asigiran; gin dedede kiko popoto piny di likame kiko yai bobo; koneneko gi bala neko mac me etala!

¹⁸Kur imokunu i gikame otimere i kare kokato, arabo ibedunu paro gikame riki otimere i kare kasek.

¹⁹Nenunu, ango ayapuno timo gimoro anyen; nataman etie timere da, benyo, likame itienu nene? Ango abino tuco yongayo i wi tim kede icileta da kunono.

²⁰Leini me obar bino mina wor, ikween kede ikululun; pien ango atuco pii i wi tim, icileta mol i wi tim kunono, pi mino jo na kame ayero pii me amata.

²¹Gin en jo na kame acweo pira tetekeny kipaka.”

²²Rwot waco be, “Wun oudo itiekunu ol keda, Okwe wun jo me Isirael; likame oudo iworanu.

²³Wun likame oudo ikelunu na giayala awanga me romini, arabo imianu wor kede giayala ace me leini. Ango oudo likame abedo lolo wu pi mito giayala, arabo olo wu pi odok angwe kur.

²⁴Wun oudo likame iwilunu na lagara atie kede mo angwe mit, arabo imianu ayeng kede kamio me giayala me leini wu. Akaka manono wun ibedunu lola kede dub wu; iolanu kede gikareco wu.

²⁵Aso di ango en Rubanga ngat kame aweo dub wu tenge pira, doko likame abino yutuno dub wu.

²⁶“Bia ootunu pido; kelunu kop kame itienu pida iye! Ketunu pido wu i nyim ekiko, tetekeny inyutunu be itimunu gikame tie kakare!

²⁷Kwaru wu me agege bin odubo; jotel wu da otimo dub buta.

²⁸Manono bin oko mino ango amio jotel wu me kabedo kacil omunaun, amio komuducaro jo me Isirael adikinicel, doko amio koyeyeto gi.”