Read kumam Isaya 44 Bible Online

Isaya 44 - kumam bible

Isaya 44

¹Rwot waco be, “Nataman winyunu, Okwe wun jo me Isirael, jotic na, jo na kame atieko yero!

²Ango en Rwot kocweo wu, ngat kotimo wu i yic, ango abino konyo wu. Kur ibedunu kede lworo, Okwe wun jo me Isirael, jotic na, jo na kame amaro, kame ayero.

³“Ango abino onyo pii i lobo kotuo, doko abino mino icileta mol i lobo kotuo. Ango abino mino tipo na but ikwae wu, kede winyo na but idwe wu.

⁴Gin kibino bedo kiber bala lum kame pii romo kiber, kibino bedo cal bala yen kame dongo i nget isamai amol.

⁵“Ngat acel bino waco be, ‘Ango dano ka Rwot,’ ngat apat da kobino lwongo be dano me Isirael, dano ace bino wandiko i bade be, ‘Me ka Rwot,’ di gin kiko bino donyo lwongere be jo me Isirael.”

⁶Rwot, Abaka me Isirael, Ngalak mere, Rwot me jo yi, waco be, “Ango abedo me agege kede me ajikini; likame tie rubanga moro ace kwanyo ango kena.

⁷Ngai kame cal bala ango? Mito gin kiwaci, miero gin kituc i nyima. Ngai kotieko waco, cako riki sek, gikame bino timere i kare me anyim? Poore gin kiwace wa gikame bino bedo tie i kare me anyim.

⁸Kur ibedunu kede lworo moro, arabo mielkom; Wun ingeunu be cako riki sek tuno nataman ango atieko waco ne wu gi dedede kame oudo bino timere. Wun en ijurak nango! Benyo, tie bobo rubanga moro ace atek? Likame tie Rubanga moro apat atek kame ango angeo akadi acel.”

⁹Jo dedede kame timo caljwogi kony gi li, doko rubangan kame pir gi tek negi nogo da likame tie kede kony moro but gi. Jo kame woro rubangan nogo wang gi oto doko kimiming. Kobino mino lewic mako gi.

¹⁰Kony likame tie me dano timo cal moro kede nyonyo di eko donyo woro bala rubanga.

¹¹Jo dedede kame woro cal nono kobino mino lewic mako. Jo kame timo caljwogi nogo obedo jo ajoa kenekene. Mito gin dedede kicokere di kiko cungo pido; lworo atek bino mako gi di oko mino lewic mako gi.

¹²Ngatet kwanyo nyonyo di eko timo tic i kome kede mac. En teko me bade mio etingo enyondo di eko nyonyoto nyonyo nono iepone kame en emito. Di en etie timo tic, kec neke, orio neke, di teko mere ko tiek.

¹³Ngapac pimo ebao. En egiro kede kalamu cal me gikame en emito timo, di eko time kiber kede jamini me tic mege; en etime i cal me dano kame cil adikinicel, di oko kete i abila.

¹⁴En eyero yat seda arabo oak amoto saipuras ki abum di eko tongo pi tic kede. Arabo en eromo pito yat di eko kuro kot cwei pi mine dongo.

¹⁵Di do oko karuno tic kede me amoka. Yen mogo en emoko kede mac me mino kome lieto, ace en etio kede me tedo. Yen apat di en eko timo kede cal me rubanga di eko donyo woro.

¹⁶Yen odong mege en eketo i mac, di eko bulo ringo iye eko camo di eko yeng. En eobo kome da kede mac nono di ewaco be, “Bu, koma oobere, mac noni liet kiber!”

¹⁷Yen apat mege dedede en etimo kede cal me rubanga, caljwogi mere, di eko luro piny wore. En elego bute di ewaco be, “Laka, in rubanga nango!”

¹⁸Akodi jo nogo miming doko likame kiniang; pien wang gi oumere, tetekeny gin likame kikaruno neno, doko tam gi da omwonere, en amio likame kikaruno niang.

¹⁹Likame tie ngatamoro kikom jo kame timo caljwogi kame tamo, akadi kame tie kede ngec arabo kame niang di eko waco be, “Dul me yat noni ango oudo awango i mac; atedo da kede akuk mere, abulo kede ringo da ako camo. Nataman do benyo benyo kame ango atimo kede caljwogi kede adul kodong mere? Benyo, kom ango abino riebere i nyim ebao di ako wore?”

²⁰Ecal acala bala camo buru. Tam mere ongale omio erwenyo, doko likame etwero lakere kene arabo waco be, “Gikame ango amako i cinga tetu cam noni mam obedo gi me angalo?”

²¹Rwot waco be, “Okwe wun jo me Isirael, yutununu gi nogi; pien wun ibedunu jotic na. Ango acweo wu pi bedo jotic na, wia likame bino wil kede wu.

²²Ango atieko wearo tim wu areco tenge bala edou kame yamo okuto, kede dub wu da kame ibedunu timo, ango aweo tenge bala ekuna. Dwogunu buta, pien ango atieko lako wu.”

²³Okwe in malo, weri, pien Rwot do otieko timo gi noni; lelemo in piny kakatut, cakunu wer, Okwe wun mori, Okwe abum kede yen dedede kame tie iye! Pien Rwot otieko do lako jo me Isirael, nan jo me Isirael bino mine dwongo.

²⁴“Ango en Rwot, ngalak ni; ngat kocwei i yi toto ni. Ango en Rwot ngat kocweo jamini dedede, ayararo malo ango kena; i kare kame ango acweo kede piny, likame tie ngat kokonya.

²⁵Ango abino mino jo kame sidiko waco ne jo winyo kame kitie kede doko jo mingo, di ako mino jo apenyo gagi doko jomingo; jo ariek ango adwoko cen, di ako mino ngec gi doko mingo.

²⁶Ango amoko kop kame ngatic na owaco, doko kop kame joor na murao cobere; Ango awaco ne Yerusalem be jo bobo bino bedo iye, kede ne bomban me Yuda be bobo kobino gero gi. Ango abino bobo medo gero bomban nogo i amejeko gi.

²⁷Ango aciko pii i nam pi tuo di eko tuo da.

²⁸Ango awaco ne Abaka Sairas be, ‘In en ngakwat na; ango abino tic kedi pi timo gikame ango cunya mito timo; in ibino mino cik di oko gero Yerusalem, doko da ibino mino kocibo acakini me Tempulo.’ ”