Read kumam Isaya 45 Bible Online

Isaya 45 - kumam bible

Isaya 45

¹Rwot otieko yero Sairas pi bedo abaka. En etieko kete pi bwono atekerin; en ecwae eoto tieko teko me abakai; Rwot bino yabo ne irutei me bomban. Rwot waco ne Sairas be,

²Ango abino cako ot ne in di ako papao mori kede imukuran pi mino yongayo bedo ni pwot. Ango abino turo irutei kame kotimo kede nyonyo buronsi di ako ngongolo ari gi me lilime.

³Ango abino mini lim kame kokano kakacol, kede abar kame kokano kabedere me mung; tetekeny in ingei be ango Rwot, Rubanga me jo me Isirael en kame atieko lwongi kede nyingi.

⁴Ango alwongi kede nyingi, pir jo me Isirael, jotic na, jo na kame ayero, amii ruom me wor, bed bala in likame ingea.

⁵“Ango en Rwot, doko likame tie moro ace; rubanga moro apat likame tie. Ango amii teko, bed bala in likame ingea.

⁶Ango atimo manoni tetekeny jo dedede, cako ki tetu kakame ceng wok kiye tuno tetu tim, ngei be likame tie rubanga moro apat; ango en Rwot, doko likame tie moro ace.

⁷Ango atimo lero, doko acweo colpiny, akelo mulem, doko akelo da gikarac; ango Rwot en kame atimo gi nogi dedede.

⁸Okwe in malo, ony tim kopoore piny; mie ecwei piny bala kot; mito lobo yabere tetekeny alako wok malo bala kodi kame tui, doko mito emi tim kopoore da bed tie i wi lobo; Ango Rwot en kame abino timo manoni.”

⁹Itie tin ican benyo in ngat kame ipiemo kede ngat kocwei! Benyo, agulu twero piem kede ngat kocwe? Iparunu be elupe twero penyo ngat kame tie tic kede me cwec be, “Nyo kame in itie timo”? arabo waco ne be, “Gikame itie cweno likame tie kede kakode”?

¹⁰Etie ican tin benyo en ngat kame epenyo papa mere be, “Nyo kame in itie yaco?” arabo kame waco ne dako be, “Nyo kame in itie ramere me nywalo?”

¹¹Rwot, Ngat Kacil me Isirael, ngat koketo ateker me Isirael waco be, “Wun iliunu kede twer me penya kop kame mako idwe na, arabo me waco na gikame oudo apoore timo!

¹²Ango en atimo wi lobo, di ako cweno jo pi bedo iye. Ango ayararo malo kede teko na; doko ango amio cik but jamini dedede kame tie iye pi gin bedo bala kame ango amito.

¹³Ango atieko keto i cuny Abaka Sairas mit me cobo timo gi kopoore kame ango amito. Ango abino mino yote dedede kame elubo riere. En ebino gero bomba na, di eko gonyo jo na kame komako bala mabus. En ebino timo manono likame pi obino gele arabo mine giamia me pwoc.” Manoni en kop kame Rwot me jo yi otieko waco.

¹⁴Rwot waco ne jo me Isirael be, “Abar me Misiri kede jamini me Abisinia bino doko meru, doko jo me Seba kame bocoboco nogo bino bedo ipasoi wu; gin kibino lubo wu di kotweo gi kede irikoi. Gin kibino luro wi gi piny woro wu di kiwaco be, ‘Wun kenekene kame itienu kede Rubanga, likame bobo tie rubanga moro apat.

¹⁵Ateteni in en Rubanga kame pwono, Okwe Rubanga me jo me Isirael, Ngalak.

¹⁶Lewic bino mako jo dedede kame timo caljwogi; gin dedede wi gi bino totolun.

¹⁷Do jo me Isirael Rwot en kame lako, doko alako kame en elako gi kede bedo nakanaka; gin lewic likame bino mako gi arabo bedo kede atotolun pi kare dedede.’ ”

¹⁸Rwot en kocweo malo; en kene ebedo Rubanga! En kame bin elulungo lobo di eko time; eko sipe ecungo di etek. En bin likame ecweo lobo di eko weke atatai, en elulungo en pi jo bedo iye. En nono kame etie waco be, “Ango en Rwot, doko likame tie rubanga moro apat.

¹⁹Ango oudo likame ayamo kede wu i mung i kakacol; ango oudo likame awaco ne ikwae ka Yakobo be, ‘Ibinunu mona i kabedo kame tie atatai.’ Ango Rwot ayamo kop me ateni, atuco gikame tie kakare.”

²⁰Rwot waco be, “Cokerenu karacel, bianu iyapiyapi, wun jo me atekerin apapat kobwot! Jo kame bedo tingo caljwogi me yen kame kopao, di kilego but rubangan kalikame karuno lako gi nogo, likame kitie kede ngec moro atwal!

²¹Bia iketunu pido wu i nyim ekiko; mito kong jo kame gango pido nono por kop gi me pido! Ngai kowaco kop noni riki sek? Ngai kotuco riki sek be gi noni bino timere? Benyo, likame ango Rwot en kame riki atuco? Likame tie rubanga moro ace kwanyo ango kenekene, Rubanga kame timo gi kopoore, kede kame lako jo.

²²“Lokerenu buta di ako lako wu, wun jo dedede me wi lobo! Ango en Rubanga, doko likame tie moro ace.

²³Ango atieko kwongere kede nyinga, atieko waco kop me ateni, kop kalikame bobo abino loko, en be, ‘Cong jo dedede bino riondiko i nyima, di gin dedede kiko kwongere pi lubo kop na.’

²⁴“Gin kibino waco be, kuo kopoore kede teko tie but ango Rwot; jo dedede kame cuny gi wang i koma bino bino buta kede lewic.

²⁵Ikwae me jo me Isirael dedede bino bedo jo olo di kiko bino mina deyo.”