Read kumam Isaya 47 Bible Online

Isaya 47 - kumam bible

Isaya 47

¹Rwot waco be, “Babilon, wok piny ki wi kom ni me ajakanut, di iko bedo piny i apua. In oudo ical bala nyako kalikame ongeo icuo, bomba kalikame komulo, do nataman manono bino lokere!

²Kwany nyar kidi icak riego. Kwany egoe me umo wi tenge! Gony ekanso ni tenge! Jung egoe malo wek tieni dong neeno, ngol ecilet.

³Komi bino dong nono; di jo ko neno komi me lewic. Ango abino timo onyanga, doko likame abino weko ngatamoro.”

⁴Ngat Kacil me jo me Isirael en Ngalak wa, nyinge Rwot me jo yi.

⁵Rwot waco ne bomba me Babilon be, “Bed di iko ling kakacol; pien likame bobo kobino lwongi be abaka adako me atekerin.

⁶Ango oudo alilo kede jo na; amio gi kidoko cal bala gi me kwer buta. Ango ako mino gi i cingi, di in likame iko nyuto negi cuny me kisa; akadi jo oti da in ibedo kede gero atek i kom gi.

⁷In oudo iparo be ibino bedo abaka adako nakanaka, omio likame iko keto gi nogi i tam ni arabo paro kite kame ajikini gi bino bedo kede.

⁸“Winy kop noni, in ngat kame imaro jamini me yomcuny, in kame itamo be itie kede anapakin. In iwaco i cunyi be likame tie ngatamoro apat kame cal bala in. In itamo be likame ibino bedo apuserut arabo neno can me to me idwe ni.

⁹Do i esawa atitidi, i ceng acel can are nogi dedede bino poto i komi. Idwe ni bino to, doko ibino doko apuserut, akadi di in itie kede twon jwok kede twer adwong me tiet.

¹⁰“In oudo itamo be itie kede anapakin i gikareco kame itimo; in oudo iparo be likame tie ngat kame romo neni. Rieko kede ngec ni oteri i rwenyo, omio in iko waco i cunyi be, ‘Likame tie ngatamoro apat kame cal bala ango.’

¹¹Can bino poto i komi, can kalikame jwok ni karuno gengo. Peko bino ngesi, peko kalikame in ingeo gimoro iye.

¹²Cung kitek i tiet ni kede i jwok ni atot atota nogo; koudo in ibedo cane iye cako di in eponga. Cengemogo kikaruno bedo kede kony buti, amotoko di iko mino lworo mako jokwor ni.

¹³In itieko ol kede tam atot atota kame komii; mito jo kame ngingico ekite kame malo tie kede bin di gin kiko laki, gin jo kame kingio acerin, di buli por duwe kimurao gikame bino timere ne in.

¹⁴“Neningo, jo nogo cal bala arienge, mac wango gi; likame kikaruno lako kom gi ken gi ki mac aliel. Manoni likame obedo mac me ayoa, en likame mac kame kobedo i ngete!

¹⁵Jo kame in ibedo cane kede gi nogo cal kamanono buti, jo kame in ibedo dubo kare ni but gi cako di in eponga. Gin dedede kibino weki di dano acelacel ko mako yongayo mere; likame tie ngatamoro kame bino laki.”