Read kumam Isaya 48 Bible Online

Isaya 48 - kumam bible

Isaya 48

¹Winyunu kop noni, wun jo me ot ka Yakobo, wun jo kame kolwongo kede nying me Isirael, jo kowok kibut Yuda. Wun ikwongerenu i nying Rwot, di iwacunu be iworunu Rubanga me jo me Isirael, do di likame kede ateni, arabo bala kame poore.

²Pien wun ilwongerenu kenu be wun jo me bomba kacil, doko igongerenu i kom Rubanga me jo me Isirael, ngat kame nyinge obedo Rwot me jo yi.

³Rwot waco ne jo me Isirael be, “Riki sek ango awaco gikame oudo bino timere, di ako ngeso timo gi di kiko cobere.

⁴Ango oudo angeo be wun ibedunu joepali, doko wi wu tek bala nyonyo buronsi, doko ngut wu nwang bala nyonyo ayon di tur nyim wu tek baba bala nyonyo buronsi.

⁵En komio ango ako waco ne wu kope nogo riki sek, di pwodi gin likame kitimere, tetekeny kur ngatamoro wac be, ‘Caljwogi na en kotimo gi nogi, kom cal apaa na kede cal atwaka en kociko gi nogi di kiko timere.’

⁶“Wun iwinyunu gikame riki ango awaco be bino timere; nataman nenunu kitieko cobere; benyo, likame ibinunu tatamo kop i kom gi? Cako nataman ot anyim ango abino waco ne wu gi kanyen, gi kopwono kalikame pwodi wun ingeunu.

⁷Ango atie timo gi nogi nataman, likame atimo gi riki sek; di pwodi ceng katin likame oudo otuno, oudo wun likame pwodi iwinyunu gi, tetekeny likame iromunu waco be, ‘Wan oudo ongeo gi sek.’

⁸Wun likame iwinyunu doko likame ingeunu gi, cako riki sek wun yit wu likame oyabere. Ango oudo angeo be wun ibinunu bedo na bala ngat kame cato dano mere, doko cako i kare kame onywalo wu kede wun ibedunu jojemo.

⁹“Pi mino jo pako nyinga, abino mino lilo na kong gal, abino didio en di likame ako muducaro wu.

¹⁰Nenunu, ango atieko jililo wu, bed bala likame bala nyonyo siliba; ango atieko tamo wu kede mac me neno can.

¹¹Ango atieko timo manoni pira, pinyo bo kame mio ango aweko kopwoko nyinga? Ango likame anywako deyo na kede ngatamoro.”

¹²Rwot waco be, Okwe wun jo me Isirael, winyunu kop na, wun jo kame ango atieko lwongo! Ango en Rubanga; ango en me agege kede me ajikini.

¹³Ango acweo acakini me lobo kede cinga, di ako yararo malo. Ka ango alwongo lobo kede malo, gin kilubo gikame ango awaco.

¹⁴“Wun dedede cokerenu di ikounu winyo! Mene kikom caljwogi nogo kame bin otuco gi nogi? Mene kotuco be ngat kame ango Rwot amaro en kame bino cobo iik nango i kom Babilon; be en ebino yi kede jo Kaldea.

¹⁵Ango kikoma en kame alwonge, atieko kele, doko gi dedede bino cobere ne kiber.

¹⁶“Nyikinonu buta di ikounu winyo kop noni! Cako i ageini ango likame amungo kop moro, doko da nakanaka ango abedo mino kop kame ayamo cobere. Nataman Rwot Rubanga otieko ora kede twer mere.”

¹⁷Rwot, Ngalak, Ngat Kacil me Isirael waco be, “Ango en Rwot Rubanga wu, ngat kame pwonyo wu pi bero wu, doko atelo wu i yongayo kame poore ilubunu.

¹⁸“Okwe koto oudo ilubunu cik na! Koto oudo mulem omol but wu bala pii me ecilet kalikame tuo. Koto oudo ibedunu bwono jokwor wu nakanaka bala ebuka me pii kame dipere i lak nam.

¹⁹Ikwae wu koto oudo obedo tot bala asinge, nying gi likame koto orwenyo akadi acel, doko koto likame komuducaro gi.”

²⁰Yaunu ki Babilon, ringunu tenge ki Kaldea, Gounu mujira pi kop noni, tatamunu en kabedere dedede; wacunu be, “Rwot otieko lako jo me Isirael, jotic mege!”

²¹I kare kame en bin etelo gi kede di kibeo i wi tim, orio likame oneko gi. En bin emio pii omol negi ki lela; en ebelo lela di pii oko mol.

²²Rwot waco be, “Ngadubo li kede anapakin.”