Read kumam Isaya 51 Bible Online

Isaya 51 - kumam bible

Isaya 51

¹Rwot waco be, “Winyunu kop na, wun jo kame imitunu bedo jo kopoore, wun jo kame itienu mono Rwot. Ngolorunu kong lela kame riki okunyo wu kiye, bur me kide kame riki okunyo wu kiye.

²Nenunu kong kwaru wu Aburaam, kede Sara ngat kame wun iwokunu kibute. Kakame ango bin alwongo kede Aburaam, en oudo etie dano acel, do ango ako mine winyo di eko nywal enyai.

³“Ango abino kweno cuny jo me Sion; abino kweno cuny jo kame tie bedo i ameje mere. Ango abino mino wi tim mere doko cal bala poto me Eden, lobo mere kotuo abino mino doko cal bala poto na. Yomcuny kede kilel bino bedo tie kunono, jo bino wero were me pwoc kede pak.

⁴“Winyunu kop na, wun jo na, doko cikunu yitu, wun ateker na; pien ango abino mino pwony na, kede tim kame poore, pi bedo lero but atekerin.

⁵Ango abino bino awakawaka di ako lako wu; alako na otieko timere. Ango abino pugo atekerin kede teko na. Lobere kame tie kakaboco tie kura, gin kitie kura kede gen pi lako gi.

⁶Tingunu wangu inenunu malo; ngolorunu lobo! Malo bino rwenyo bala yiro; wi lobo da bino ti bala egoe, di jo kame bedo iye ko bino to bala lwangini. Do alako kame ango akelo bino bedo nakanaka; twer nango me alako likame jik.

⁷“Winyunu kop na, wun jo kame ingeunu gikame poore, wun jo kame pwony na tie i cunyu; kur ibedunu kede lworo ka jo cao wu, doko kur cunyu poti ka gin kiyeto wu.

⁸Gin kibino rwenyo bala egoe kame ajekel ocamo, kudiling bino camo gi bala yer me oromo; do twer nango me alako likame jik; alako kame ango akelo tie pi lwak me kare dedede.”

⁹Cei, cei Rwot, dok tek, tii kede twer ni di iko lako wa! Cei bala bin i kare kasek, bala kame bin itimo kede ne lwak me kare kasek! Benyo, mam in en kame riki ingongolo Rakab i adulion, doko icobo twol kiyiliyili?

¹⁰Benyo, likame in en kame bin imio nam otuo, pii me nam atut; di iko yabo yongayo obeo i dier nam tetekeny jo kame in ilako ngol loka tetuca?

¹¹Jo kame Rwot olako bino dwogo, gin kibino donyo Sion di kiwero. Gin kibino bedo kede yomcuny kalikame tiek. Kuo gi bino pong kede kilel kede yomcuny, cwercuny kede cur bino yai tenge ki kuo gi.

¹²Rwot waco be, “Ango en kame akweo cunyu; pinyo kame mio wun ilworunu dano kame miero toi, dano adana kame cal bala lum kame ner di eko to?

¹³Wun wi wu otieko wil kede Rwot ngat kocweo wu, ngat koyararo malo di eko cibo acakini me lobo. Wun buli ceng ibedunu kede lworo piny yuluyul pi gero me jo kame tero wu kirac, jo kame cuny gi mito muducaro wu. Do ani kara gero gin nono?

¹⁴Jo kame tie mabus kobino gonyo gi oyotoyot; likame kibino to di kiko ot i kabedo me jo oto, arabo bedo li kede cam.

¹⁵“Ango en Rwot Rubanga wu; ango arubo nam di ako mino ebuka mege mor. Nyinga en Rwot me jo yi.

¹⁶Ango en kame ayararo malo di ako cibo acakini me lobo; ango awaco ne jo me Sion be, ‘Wun en jo na! Ango atieko keto kope na i dogu, doko ango agwoko wu kede cinga.’ ”

¹⁷Cei, cei ki wang nino! Yai malo, Okwe Yerusalem, Rwot otieko mini imato gikame tie i yi ikopo mere me lilo, in itieko mato kiton cete, di eko mini igete.

¹⁸Likame tie ngatamoro kame romo peni pi teli, likame tie moro akadi acel kikom idwe kame in inywalo; likame tie moro kame romo mako cingi me peni pi teli kikom idwe kame in ipito.

¹⁹Can are dedede otieko poto i komi: yi otieko dudubo in, doko kec agwai opoto ne jo ni. Ngai kame bino kweno cunyi?

²⁰Idwe ni otieko wile, kitie buto i ajikini me yote dedede bala amiem komoko i bwoi. Lilo ka Rwot oromo gi, iretakin ka Rubanga ni.

²¹Pi mano, winyunu kop noni wun jo kame kowano, jo komer, do likame kede bwini.

²²Rwot Rubanga wu ngat kame pido piru waco be, “Nenunu, ango atieko kwanyo tenge ki cing wu ikopo me lilo na kame oudo wun imatunu di ikounu gete; likame bobo ibinunu mate.

²³Ango abino do mine but jo kame oudo tero wu kirac; jo kame oudo waco ne wu be, ‘Rieberenu piny, tetekeny wan oder ngei wu’; di wun ikounu loko ngei wu odoko cal bala piny, arabo yongayo kame gin do kidero kede tien gi.”