Read kumam Isaya 52 Bible Online

Isaya 52 - kumam bible

Isaya 52

¹Cei, cei ki wang nino, Ud teko, Okwe Sion! Ngap igoen ni acil, Okwe Yerusalem, bomba kacil; pien jo kalikame kokepo kede jo komunaun likame bobo bino donyo buti.

²Yai malo, teng apua ki komi, Okwe in Yerusalem, in itie bala mabus. Gonyi irikoi ki nguti, Okwe in Sion!

³Rwot Won twer waco be, “I kare kame bin wun idokunu kede ipasoi, likame bin koculo sente moro me wilo wu; kamanono da, likame kobino culo gimoro pi lako wu.

⁴Riki sek wun iotunu bedo Misiri bala jokumbor; jo Asiria da bin otero wu kirac abongo tien kop moro.

⁵Nataman bobo kotero wu bala mabus abongo tien kop moro. Nyo do kame ango audo iye? Jotel wu kok, doko kocaa nakanaka piny yuluyul.

⁶Pi mano, ibinunu ngena; ibinunu ngeno be ango Rubanga inononi kame atie yamo kede wu; ango ine kan.”

⁷Neno ngaor kame bino ki wi mori kede kop aber me mulem tin mit benyo! En ngat kame ekelo kop aber me alako, ngat kame waco ne jo me Sion be, “Rubanga wu en abaka!”

⁸Winyunu! Jo kame daro bomba tie lelemo, gin kitie wer karacel pi kilel; pien gin kitie neno kede wang gi dwogo ka Rwot i Sion.

⁹Dipunu wer karacel, wun amejeko me Yerusalem; pien Rwot otieko kweno cuny jo mege, etieko lako Yerusalem.

¹⁰Rwot otieko nyuto ne atekerin dedede twer mere; doko jo dedede me piny bino neno alako kame Rubanga wa kelo.

¹¹Yaunu, yaunu tenge ki kunono! Wun jo kame yeo jamini me timo tic ka Rwot, kur imulunu gimoroni komunaun; yaunu tenge kiye di ikounu lonyere.

¹²Likame ibinunu yai kede mielkom, doko likame ibinunu ringo aringa; pien Rwot bino telo ne wu yongayo, doko Rubanga me Isirael en kame bino gwoko wu ki cen ngei wu.

¹³Rwot waco be, “Neningo, ngatic na bino cobo timo tic mere kiber; kobino mine wor adwong di oko tinge malo, di en eko bino bedo malo twal.

¹⁴Jo atot bin onene di kom gi oko to; nyime oudo odubere likame cal bala me dano, doko cal me kome do oudo pat apata kede me jo.

¹⁵Nataman da en ebino cungo wi atekerin atot; Abakai bino bedo li kede kop me ayama pi en. Gin kibino neno gikame lem pwodi gin likame kiwinyo kop i kome, di kiko bedo kede par i kom gikame lem gin pwodi likame kiwinyo kop i kome nono.”