Read kumam Isaya 53 Bible Online

Isaya 53 - kumam bible

Isaya 53

¹“Ngai kotieko yei kop kame wan otatamo? Doko ngai en kotieko neno twer ka Rwot i gi noni?

²Oudo ebedo mit ka Rwot pi ngatic mere dongo i nyime bala yat kame pwodi dongo adonga, kede bala alias kame wok kakotuo. En oudo erarac doko eli kede ruom kame koto mi wa opar pi nene, likame tie gimoro kame oudo romo wano tam wa i kome.

³Wan ocaenu di okounu dage; engirikino cwercuny eko nao kede neno can. Likame tie dano moro kame oudo mito ngoloro en. Wan ocaenu bala ebedo dano kame kony mere li.

⁴“Ateteni en etieko ngirikino can wa, di eko yeno tuwo wa; do di wan oudo otamo be en etie neno can kame Rubanga omie.

⁵Do en bin kocobe pi dub wa, kowane pi tim areco wa. Wan oudo anapakin i kuo wa pi alola kame en ebeo iye, ocangunu pi aporeso mege.

⁶Wan dedede ocalunu bala romini kame oudo orwenyo, ngat acelacel oudo tie ot tunge kene. Do Rwot oko keto i kome can me dub wan dedede.

⁷ “En oudo kotere kirac, koketo can i kome, do en likame engamo doge yamo akadi kop acel. En oudo eling alinga bala atin oromo kame kotie tero ot ngolo, kede bala oromo kame kotie nyaro yer mere.

⁸En oudo komake di oko ngolo ne kop abongo ateni di oko tere tenge, ngai kame oudo paro pi kite kame anyim mere bino bedo kede? En oudo kotieko kwanye tenge ki lobo me jo akuo, komie eneno can pi dub me jo wa.

⁹Koribe i yi ates karacel kede jo kotimo gikareco, koyike karacel kede jo kobaro, bed bala en oudo likame ebedo kede tim moro me gero, arabo waco kop moro me angalo.”

¹⁰Rwot waco be, “Manono oudo obedo mit nango pi mine awanon di eko neno can; to mere oudo obedo giayala pi dub. En ebino neno ikwae mege, doko ebino bedo kuo pi kare kalac; En ebino mino mit nango cobere.

¹¹En ebino neno bero kame wok ki lito kame en ebeo iye; ebino ngeno be can kame en eneno likame obedo me nono, di cunye ko bino kwei. Ngatic na kopoore bino mino jo atot doko jo kopoore, en ebino yeno dub gi.

¹²Pi mano, ango abino mine kabedo me wor i dier jo kame pirgi tek, di en eko bino poko kede jo atek jamini kame koyako i yi. En bin ejalo kuo mere doko oudo komare i kom jodubo; aso di en oudo eyeo dub me jo atot, doko elego pi jodubo.”