Read kumam Isaya 55 Bible Online

Isaya 55 - kumam bible

Isaya 55

¹Rwot waco be, “Wun jo dedede kame orio oneko, bia imatunu pii; wun jo kame iliunu kede sente, bia iwilunu cam di ikounu camo! Bianu! Wilunu bwini kede cak abongo sente doko abongo cul moro.

²Pinyo bo kamio wun idubunu sente wu wilo gi kalikame obedo kwon, kede idubunu teko wu i gi kalikame yengo wu? Winyunu kop na, di ikounu camo gikame ber; ikounu bino camo cam kame ber kalamo kede yomcuny.

³“Cikunu yitu di ikounu bino buta; winyunu, tetekeny ibedunu kuo. Ango abino timo kede wu isikan kame bedo nakanaka, isikan me amara na kalikame lokere, kede kame genere, kame bin amio Daudi.

⁴Nenunu, ango bin akete pi bedo ngatel kede ngapug me atekerin; en oudo ebedo mujura na but gi.

⁵Ibinunu lwongo atekerin kalikame ingeunu, di atekerin kalikame ngeo wu ko ringini butu, pien Rwot Rubanga wu, Ngat Kacil me Isirael otieko mino wu dwongo.”

⁶Mounu Rwot di pwodi etwero udere, kokunu bute di pwodi etie iyapiyapi.

⁷Jo kame timo gikareco miero wek yongayo me kuo gi nono, doko jo kalikame opoore miero wek gikame tie i tam gi; miero gin kidwog but Rwot, tetekeny en kisa make kede gi. Miero kidwog but Rubanga wa, piento en ebino sasiro gi adikinicel.

⁸Rwot waco be, “Tam nango likame cal bala megu, doko yote na da pat kede megu.

⁹Bala kame malo bor kalamo kede piny, kamanono da yote nango kede gikame ango atamo kalamo megu.

¹⁰“Kop kame ango awaco cal bala akako kede kot kame wok ki malo, di likame kiko dok tuno di kitieko bido lobo. Gin kimio kodere tui di kiko dongo, kimio kodi me acuwa kede cam kame kocamo bedo tie.

¹¹Kop kame ango awaco da bino bedo kamanono; likame ebino dwogo buta abongo timo gikame ango acwae iye, do en ebino cobo timo gikame ango amito ne timo.

¹²“Wun ibinunu yai ki Babilon kede kilel; ibinunu dok paco kede mulem. Mori kede imukuran bino dipo wer di wun ibeunu i nget gi, doko yen dedede bino bapo cing gi.

¹³Yen saipuras bino tui akaka okuto; yen kame ngwece gi kur bino tui akaka ocokocok; manono bino bedo gianena kame bedo nakanaka, gikame poo wi jo i kom gikame ango Rwot atieko timo.”