Read kumam Isaya 56 Bible Online

Isaya 56 - kumam bible

Isaya 56

¹Rwot waco be, “Timunu gikame poore kede kame ber, pien ango ayapuno lako wu.

²Etie kede yomcuny dano kame timo gi noni, ngat kame ketakin iye kitek; dano kame gwoko Sabato di likame emunao en, doko likame etimo gimoro arac.”

³Kur imiunu ngakumbor kame otieko bino but Rwot wac be, “Rwot ateteni bino poka tenge kikom jo mege.” Kur imiunu abwocit wac be, “Ango acal do bala yat kotuo.”

⁴Rwot waco ne abwocin be, “Ka wun igwokunu Sabato na di itimunu gikame yomo cunya kede di iketakinunu kitek i gwoko isikan na,

⁵ango abino mino koyutuno nyingu i tempulo na kede i diere me jo na pi kare kalac kalamo ka koto oudo inywalunu idwe awobe kede anyira. Abino mino wu nying kame bedo nakanaka, nying kalikame bino rwenyo.”

⁶Rwot waco kaman ne jokumbor kame bino bute, jo kame mare di kitimo tic mere, jo kame gwoko Sabato di likame kimunao en, kede kiketakin gwoko isikan mere be,

⁷“Ango abino kelo wu i moru na kacil di ako mino wu yomcuny i oda me ilega, doko ako bino gamo giayala awanga wu kede giayala apat mege i wi alutari na; pien oda kobino lwongo be ot me ilega pi jo dedede.”

⁸Rwot Rubanga ngat kocoko jo me Isirael kame oudo kotero tenge waco be en ebino coko jo apat da emedo i kom gi.

⁹Rwot otieko waco ne atekerin apat dedede, pi bino bala leini me obar di gin kiko neko jo mege.

¹⁰En ewaco be, “Jotel dedede kame koketo pi koto kwenyaro jo na, wang gi oto! Likame tie gikame kingeo. Gin kical do bala igwogin kalikame gweo; kibedo buto abuta di kileko. Okwe, kite kame kimaro kede nino!

¹¹Gin kical bala igwogin kame tie kede kiru atek; likame tie gikame romo gi. Jokwat nogi likame tie kede niang; gin dedede kitieko lokere lubo yote kame mako gin. Ngat acelacel timo bala kame cunye mito pi bero kame make.

¹²Gin kilwongere be, ‘Bia ootunu oomunu bwini, di okounu mato akec mere paka romo wa! Ceng adiki bino bedo cal acala bala tin, doko ebino bedo ber kalamo.’ ”