Read kumam Isaya 57 Bible Online

Isaya 57 - kumam bible

Isaya 57

¹Kame jo kopoore oto, likame tie ngatamoro kame paro kop i kom to gi. Kokwanyo jo kame maro Rubanga di oko tero, do likame tie ngatamoro kame niang be kotie tero gi tenge pi kwanyo gi ki can.

²Jo kopoore donyo i kuo me mulem ka gin kito; gin kibino wei i kabuto gi.

³Do wun, bianu kan! Wun jojwogi, joadote kede imalayan.

⁴Ngai kame wun itienu tuko kede? Ngai kame wun ingangamunu ne dogu di iwowotunu ne lebu pi nywaro? Benyo, likame wun ibedunu jodubo kede joangalo?

⁵Gikame wun iparunu kenekene en timo caro i dud yen dedede oduko, kakame koworo kiye caljwogi. Wun ingolunu idwe wu bala giayala i kakame obarere me lela i aditoto.

⁶Wun iyerunu kide apwot me aditot pi bedo rubanga wu; manono meru. Wun ionyunu negi giayala amata doko iterunu negi giayala me alos. Iparunu be cunya yom pi gi nogi?

⁷Wun ipetunu kabuto wu malo i wi mori aboco, di ikounu yito kunono pi mino giayala.

⁸Iketunu caljwogi wu i ngei ikekon kede i ngei ipirin me ikekon. Wun iwekanu; igonyunu igoen wu di ikounu yito i kabuto wu kame lac kede ipalon wu kame ipatanunu kede gi pi buto kede wu.

⁹Wun isutunu kede moe angwe kur di ikounu ot woro rubanga Molek. Wun iorunu jo oto kakame bocoboco, kiton i kabedo me jo oto pi mono ne wu rubangan me awora.

¹⁰Iolunu i wire wu nogo, do likame iwacunu be kony mere li. Mit me cunyu dwong i kom gin omio imeedenu ameda i tim nono.

¹¹Rwot penyere be, “Rubangan mege igonogo kame wun ilworunu, tetekeny wun iwacunu na kope me angalo di wi wu ko wil keda, arabo di likame ikounu tamo pira? Benyo, mam wun likame ilworanu pien ango abedo ling i kom dub wu pi kare kalac?

¹²Wun itamunu be gikame itimunu opoore, do ango ayaro nyuto kakaler gikame wun itimunu di likame kiko konyo wu.

¹³Ka wun ikokunu pi mito kony, poore caljwogi kame wun icokunu nogo laku! Yamo bino kuto gi etero gi tenge. Do jo kame ringini gwokere buta, lobo bino doko mergi doko gin kibino bedo i moru na kacil.”

¹⁴Rwot waco be, “Iikunu, iikunu yongayo ne jo na; kwanyunu tenge gi dedede kame romo getaro gi.”

¹⁵“Ango en Rubanga kame tie malo, Rubanga kacil, ngat kame bedo nakanaka. Ango abedo kakame tie malo, kabedo kacil, doko abedo da kede jo kame mwolere di kiswilaro, tetekeny adwok cuny gi kede gen gi.

¹⁶Ango en kame amio kuo but jo na, doko likame abino bedo pido gi nakanaka arabo lilo kede gi atwal.

¹⁷Ango oudo alilo kede gi pi dub gi kede eranga gi, di ako mino gi alola, doko ako pwono negi. Do gin kiko meede dok lubo yote gi.

¹⁸“Ango atieko neno tim gi, do ango abino cango gi. Abino telo gi di ako kweno cuny gi, doko da abino kweno cuny jo kame tururo.

¹⁹Ango amio mulem but jo dedede, but jo kame tie kakiyapi kede but jo kame tie kakabor! Ango abino cango jo na.

²⁰Do jo kame timo gikareco cal bala nam kalikame kwei; nam kame ebuka mere likame weko kelo cwoto.

²¹Jo kame timo gikareco li kede mulem.” Manoni en kop kame Rubanga na owaco.