Read kumam Isaya 59 Bible Online

Isaya 59 - kumam bible

Isaya 59

¹Nenunu, likame be pi Rwot odoko goro en komio likame emito lako wu arabo be yite oding en komio likame ewinyo kwac wu.

²Do dub wu en komio en likame ewinyo kwac wu. Dub wu en kotieko poko wu kede Rubanga wu. Dub wu en komio en ekano wange kibut wu, tetekeny kur ewiny kwac wu.

³Pien cing wu opwokere kede remo, doko lwet wu da dub opong iye; dog wu waco kope me angalo, leb wu da weweo kope me tim areco.

⁴Likame tie dano moro kame pido dano ocelu i kop me ateni. Wun iketunu gen wu i kope me angalo pi lono pido. Ibedunu paro tam me timo can i kom jo icegun di ikounu timo dub.

⁵Gikareco kame wun i iikunu pi timo cal bala beko me abeon me ipom, arabo timo egoe kede bwoi me otiemotiem; ngat kame camo abeon nogo to, doko ka koneneko abeon nogo, imosogan wok kiye.

⁶Bwoi me otiemotiem likame karuno doko egoe, doko likame kokaruno ngape. Wun itimunu gikareco, doko itienu kede tim me gero.

⁷Wun tien wu dwir ot timo gikarac, doko ionyarunu ot neko dano ali kede raco moro; gikame wun iparunu i tam wu obedo tam me timo gikareco. Kabedere dedede kame wun iotunu iye idudubunu en di ikounu weke edong nono.

⁸Wun likame ingeunu bedo me mulem, arabo timo ne jo icegun gikame poore. Ilubunu yote kogomugomun, doko jo kame lubo yote nogo likame bino udo mulem.

⁹Jo waco be, “Wan likame kotimo ne wa gikame poore, doko Rubanga likame lako wa ki cing jo kame tero wa kirac. Wan oudo ogeno udo lero, do colpiny kenekene en kame tie.

¹⁰Wan orarapo piny bala imuduka kame rarapo apama; orarapo piny bala jo kame wang gi li. Wan ogetenu i dier iceng ineno bala iwor; wan do ocalunu acala bala jo otieko to.

¹¹Wan dedede ongururunu bala edubu, doko okokunu kede iturur bala aweleko. Okurunu Rubanga pi lako wa ki cing jo kame tero wa kirac, do likame tie gimoro kame timere.

¹²“Rwot, dub wan odure adura i nyimi, doko kipido wa. Wan ongeo dub wa dedede.

¹³Wan otieko turo iswilia ni, odagi, doko otieko dagi lubi. Oyamo kenekene kope me tero jo kirac kede jemo ni. Gikame wan otamo en kope me angalo kede yamo kope nogo i cuny wa.

¹⁴Ngolo kop me ateni odoko li, doko tim kopoore bor kibut wa. Ateni likame komito winyo i kakame kopido iye, doko tim me ateni likame noko kunono.

¹⁵Ateni li, doko ngat kame weko tim areco kotimo ne can.” Rwot oneno manoni di cunye likame oko bedo yom iye, pien ngolo kop me ateni oudo li.

¹⁶En ebedo kede ur pi neno be likame oudo tie dano moro kame romo cungo pir jo kame kotie tero kirac. Manono en komio en eko tic kede twer mere pi lako gi; poore mere en komio en etimo manoni.

¹⁷En engapo kuo kopoore bala ebuku me gagao kor, kede twer me lako jo bala ocoro atek me gwoko wic. En ebino bedo kede cuny me timo onyanga bala egoe mere me angapa, di eko umere kede lilo bala egoe adoka.

¹⁸Rwot bino culo kwor i kom jokwor mege di lubere kede gikame gin kitimo, akadi jokwor kame tie i lobere me dog nam adwong.

¹⁹Cako ki bad tetu kide tuno i bad tetu tim jo dedede bino lwore, gin kibino lworo twer mere adwong. En eyaro bino bala pii me ecilet kame ringo kitek, pii kame yamo tie kolo.

²⁰Rwot waco be, “Ango ayaro bino Sion di ako lako wun ikwae ka Yakobo; abino lako jo dedede kame lokere tenge ki dub gi.

²¹Isikan kame ango atimo kede wu ine: twer na kame amio wu, kede kop na kame atieko keto i dog wu, likame bino yai tenge kibut wu arabo kibut idwe wu amoto ikwae wu cako nataman tuno ikar kede ikar.”