Read kumam Isaya 61 Bible Online

Isaya 61 - kumam bible

Isaya 61

¹ Tipo ka Rwot tie i koma. En etieko yera di eko oora pi kelo ne jocan kop aber, pi cango jo kame tie kede cwercuny, pi waco ne jo kame komako kede ne mabus kop kame mako gonyo gi.

²Rwot oora pi bino waco ne jo be kare otieko tuno kame en bino nyuto kede bero mere but jo mege, di eko timo onyanga i kom jokwor gi. En etieko ora pi bino kweno cuny jo dedede kame tururo,

³pi mino jo kame tururo i Sion yomcuny kede ilel akaka cwercuny, wer me pak akaka iturur. Gin kobino lwongo gi be yen oak kame Rwot en kopito. Gin dedede kibino timo gikame poore, di kiko nyuto deyo ka Rwot.

⁴Gin kibino gero bobo bomban kame oudo obedo amejeko pi kare kalac.

⁵Jo na, jokumbor bino bedo jotic wu. Gin kibino gwoko romini wu, kibino puro poti wu di kiko gwoko olok wu.

⁶Do wun kobino lwongo wu be josaseredoti ka Rwot, jotic ka Rubanga wa. Wun ibinunu camo abar me atekerin, di ikounu bedo i mulem pi abar gin.

⁷Wun oudo komio wu lewic adikinicel, oudo likame komio wu wor, pi manono ibinunu udo mulem adwong kalamo, doko ibinunu bedo kede yomcuny nakanaka.

⁸Rwot waco be, “Ango amaro tim kapoore, do cunya dagi tim me yak kede me turo iswil. Ango abino bedo kede genere di ako culo jo na kakare, doko abino timo kede gi isikan kame bedo nakanaka.

⁹Ikwae gi bino ngere i diere me atekerin, jo dedede kame neno gi bino ngeno be gin kibedo jo kame ango atieko mino winyo.”

¹⁰Ango abino ilel pi gikame Rwot otieko timo. Cunya bino bedo yom i kom Rubanga na; piento en etieko ngapo na alako bala egoe, etieko ngapo na tim kopoore bala ekanso, bala kame eteran ngapo kede ocoro aber pi tubuso kome, kede bala kame ateran tubuso kede kome kede mwolere.

¹¹Ateteni bala kame kodi tui kede di eko dongo, kede bala kame poto mio kede gikame kocuwo iye tui, kamanono da Rwot Rubanga bino mino tim kame poore kede pak wok kibut atekerin dedede.