Read kumam Isaya 62 Bible Online

Isaya 62 - kumam bible

Isaya 62

¹Ango likame abino ling pir Sion, doko likame abino wei pir Yerusalem, tuno di alako otuno ne bala ru me piny, di eko donyo liel bala toc.

²Atekerin bino neno tim me laki, doko abakai dedede bino neno deyo ni. Kobino lwongi kede nying anyen, nying kame Rwot kikome en kame bino mino.

³In ibino bedo cal bala ocoro acil me ajakanut atie i cing Rwot, ocoro me pug atie i cing Rubanga ni.

⁴Likame bobo kobino lwongi be “Bomba kame Koweko,” doko lobo ni da likame bobo kobino lwongo be “Dako kame Koweko,” do kobino lwonge be “Cuny Rubanga Yom i kome.” Lobo ni kobino lwongo be, “Konyome,” pien cuny Rwot yom i komi, doko en ebino bedo cal bala cwar lobo ni.

⁵Bala kame awobi nyomo kede nyako, kamanono da ngat kocwei[9] bino nyomi. Bala kame eteran lelo kede pi ateran mere, kamanono da Rubanga bino lelo piri.

⁶Ango atieko keto jodar piny i wi apama ni, Okwe Yerusalem; iwor kede iceng gin likame miero kilingi. Gin miero kipoi wi Rwot i kom cikere mege di likame kiweko wie wil.

⁷Gin miero kur kimie kare me wei tuno di en etieko sipakino Yerusalem, di eko mine edoko bomba kame nyinge iruo i wi lobo lung.

⁸Rwot otieko kwongere kitek, doko pi teko mere, en ebino timo gi nono. En etieko waco be, “Likame bobo abino mino cam wu doko me jokwor wu. Jokumbor likame bobo bino mato bwini kame wun icanenu pi udo.

⁹Do wun jo kame ipurunu di ikounu coko cam wu ki poti, en kame ibinunu camo cam wu di ikounu pwono Rwot. Wun jo kame igwokunu olok di ikounu ngwedo, en kame ibinunu mato bwini i diakal me tempulo na.”

¹⁰Jo me Yerusalem, donyunu ooko me bomba, iikunu yongayo ne jo wu kame tie dwogo! Iikunu yongayo adwong; depunu kide tenge kiye! Sipunu imendera tetekeny atekerin karuno neno.

¹¹Rwot otieko waco ne jo me piny lung pi waco ne jo me Sion be, “Nenunu, Rwot tie bino lako wu; en etie bino kede giamia me pwoc mere.”

¹²Wun kobino lwongo wu be “Jokacil”, “Jo kame Rwot Otieko Lako”. Yerusalem kobino lwongo be “Bomba kame Rubanga maro”, “Bomba kalikame Rubanga Oweko”.